जिल्हाधिकारी डॉ.राजेंद्र भारूड यांच्या स्वाक्षरीने नंदुरबार येथील समाज कल्याण विभागाचे सहायक आयुक्त यांनी समिती गठित करण्याचे आदेश काढले आहेत. जिल्ह्यातील ज्येष्ठ नागरिकांच्या समस्या सोडविण्यासाठी, जिल्हाधिकारी यांनी व्यासपीठ तयार करून दिल्याबद्दल ज्येष्ठ नागरिक संघ व संस्थांकडून जिल्हाधिकाऱ्यांचे आभार व्यक्त करण्यात येत आहेत. माता-पिता व ज्येष्ठ नागरिक यांच्या निर्वाह व कल्याणासाठी संविधानात हमी दिलेल्या व मान्य केलेल्या अधिक परिणामकारक तरतुदींची व त्याच्याशी संबंधित आणि तदअनुषंगिक बाबींची तरतूद करण्यासाठी अधिनयम २००७ देशात लागू करण्यात आला. अधिनियमाच्या प्रभावी अंमबजावणीसाठी सामाजिक न्याय व विशेष साहाय विभागाने अधिसूचित केल्यानुसार संनियंत्रण समिती गठित करण्याचे नमूद आहे. जिल्हा समितीची रचना, अशासकीय सदस्यांचा पदावधी, कार्यपद्धतीचे नियम आणि इतर आनुषंगिक बाबी राज्य शासनाने एका आदेशाद्वारे विनिर्दिष्ट केलेले आहे. त्या आनुषंगाने समितीची रचना करण्यात आली आहे.
समितीच्या अध्यक्षपदी जिल्हाधिकारी राहणार असून, सहअध्यक्षपदी जि.प.चे मुख्य कार्यकारी अधिकारी, नंदुरबार समाज कल्याण विभागाचे सहायक आयुक्त तर सदस्य म्हणून जिल्हा समाज कल्याण अधिकारी, नगरपालिकेचे मुख्याधिकारी, जिल्हा पोलीस अधीक्षक, जिल्हा आरोग्य अधिकारी, जिल्हा महिला बालविकास अधिकारी यांच्यासह अशासकीय सदस्य म्हणून संत नरहरी महाराज ज्येष्ठ नागरिक मंडळाचे उपाध्यक्ष व सरदार पटेल ज्येष्ठ नागरिक संघाचे सल्लागार ॲड. गोविंद विठ्ठल पाटील, आई-वडील व ज्येष्ठ नागरिक कल्याण संस्थेचे संस्थापक अध्यक्ष बारकू नवल पाटील यांची नियुक्ती करण्यात आली आहे.