लोकमत न्यूज नेटवर्क
नंदुरबार : कोरोनामुक्तीचे समाधान जिल्हावासीयांना अवघे २४ तासच लाभू शकले. १८ रोजी सायंकाळी जिल्ह्यातील सर्व रुग्ण कोरोनामुक्त झाल्याचे जाहीर करण्यात आले आणि १९ रोजी रात्री एका रुग्णाचा अहवाल पॉझिटिव्ह आला. रजाळे, ता.नंदुरबार येथील हा ६४ वर्षीय रुग्ण असून तो मुंबई येथील कांदीवली भागातून आलेला आहे. जिल्हा रुग्णालयात तपासणीसाठी गेला असता तेथे दाखल करण्यात आले होते. त्यांचा स्वॅब तपासणीसाठी पाठविण्यात आला होता. मंगळवारी रात्री अहवाल पॉझिटिव्ह आला. रुग्णाला लागलीच आयशोलेशन कक्षात दाखल करण्यात आले असून उपचार सुरू आहेत.
रजाळे येथे कोरोनाबाधीत रुग्ण असल्याचा अहवाल येताच प्रशासन तेथे दाखल झाले. रात्रीच उपाययोजना सुरू करण्यात आल्या.
रुग्णाच्या संपर्कातील पाच व्यक्तींचे स्वॅब तपासणीसाठी पाठविण्यात आले आहेत. दुय्यम संपर्कातील ९ जणांना क्वॉरंटाईन करण्यात आले आहे. गावात जंतूनाशक फवारणी करण्यात आली आहे. बॅरीकेटींग देखील केली गेली आहे.
रजाळे येथील रुग्णाचा अहवाल पॉझिटिव्ह येताच त्याच्या ट्रॅव्हल हिस्ट्रीची माहिती प्रशासनाने जाणून घेतली. रुग्ण कांदीवली येथे राहत होता. तेथून तो लॉकडाऊन शिथील होताच रजाळे येथे गावी आला. आल्यानंतर गावातच थांबला होता
रुग्णाने सिव्हील हॉस्पीटलमध्ये तपासणी केली. ताप उतरत नसल्याने दाखल करून घेण्यात आले. स्वॅब घेवून तपासणीला पाठविला होता. दोन दिवसांनी त्याचा अहवाल प्राप्त झाला.
पॉझिटिव्ह रुग्ण गावात आणखी कुठेकुठे फिरला, कुणाला भेटला, नंदुरबारात किंवा इतर ठिकाणी खाजगी दवाखान्यात तपासणीसाठी गेला होता का? यासह इतर अनेक बाबींचे उत्तरे येणे अद्याप बाकी आहेत.