सुलवाडे, बामखेडा, कळंबूत रुग्ण आढळल्याने उपाययोजना

लोकमत न्यूज नेटवर्क
ब्राह्मणपुरी/बामखेडा/कळंबू : शहादा तालुक्यातील सुलवाडे, बामखेडा त.त. व कळंबू येथे कोरोना बाधित प्रत्येकी एक रुग्ण आढळून आल्याने या गावांमध्ये ग्रामपंचायत व आरोग्य विभागातर्फे उपाययोजना करण्यात येत आहेत.
सुलवाडे येथे फवारणी
शहादा तालुक्यातील सुलवाडे येथील ७० वर्षीय वृद्ध महिला धुळे येथे कोरोना अहवाल पॉझिटीव्ह आल्याने सुलवाडे गावात आरोग्य विभागाकडून उपाययोजना सुरू असून संपर्कात आलेल्या चार जणांचे स्वॅब घेण्यात आले आहेत. धुळे येथील एका खाजगी दवाखान्यात महिलेला उपचारासाठी नेण्यात आले होते. तेथे महिलेचा कोरोना अहवाल पॉझिटीव्ह असल्याचा अहवाल रविवारी सकाळी स्थानिक आरोग्य विभागाला प्राप्त झाला. आरोग्य विभागाचे कम्युनिटी हेल्थ आॅफिसर डॉ.प्रसाद पाटील, औषध निर्माण अधिकारी मधुकर पाटील, आरोग्यसेवक कुवर, सोनिया महेंद्रे व आरोग्य पथकामार्फत उपाययोजना करण्यात येत असून कोरोना पॉझिटीव्ह महिलेच्या कुटुंबातील चार जणांचे स्वॅब तपासणीसाठी पाठविण्यात आले आहे. ग्रामपंचायतीतर्फे गावात फवारणी करण्यात आली असून बाहेरून येणाऱ्या नागरिकांवर लक्ष ठेवले जात आहे. सरपंच कैलास पवार, उपसरपंच अशोक वाघ, ग्रामसेवक बी.आर. माळी, दिलीप पवार, पोलीस पाटील सचिन पवार आदी गावात लक्ष ठेवून आहेत.
बामखेड्यात पुन्हा रुग्ण
बामखेडा येथील ७७ वर्षीय वृद्धाला नाशिक येथे खाजगी रुग्णालयात मूत्राशयाच्या उपचारासाठी दाखल करण्यात आले होते. तेथे दाखल होण्याअगोदर कोरोनाची तपासणी केली असता त्यात ते पॉझिटीव्ह आढळून आल्याने गावात खबरदारी घेतली जात आहे. वडाळी येथे एक रुग्ण आढळून आल्याने बामखेडा गाव आधीच बफर झोनमध्ये होते. या रुग्णाच्या संपर्कातील तीन जणांना स्वॅब तपासणीसाठी शहादा येथील केंद्रात पाठविण्यात येणार असून सध्या त्यांना होम क्वारंटाईन करण्यात आले आहे. खबरदारीचा उपाय म्हणून गावात तीन दिवस जनता कर्फ्यू पाळण्यात येणार आहे. आरोग्य विभागाकडून गावात सर्वे करण्यात येत आहे. ग्रामपंचायत प्रशासन व पोलीस पाटील डॉ.योगेश चौधरी, वडाळी आरोग्य केंद्राचे वैद्यकीय अधिकारी डॉ.राजन दुग्गड व आरोग्य कर्मचारी परिस्थितीवर लक्ष ठेवून आहेत.
कळंबूत ११ जण क्वारंटाईन
शहादा तालुक्यातील कळंबू येथे कोरोनाचा शिरकाव झाल्याने प्रादुर्भाव वाढूनये यासाठी खबरदारीचा उपाय म्हणून आरोग्य विभाग व ग्रामपंचायत प्रशासने उपाययोजना हाती घेत बाधित रुग्णांचे घर व परिसर कंटेन्मेंट झोन म्हणून घोषित केला आहे. कळंबू येथील एका ७१ वर्षीय पुरुषाचा अहवाल रविवारी पॉझिटीव्ह आल्याने गावात खबरदारीच्या उपाययोजना म्हणून कोरोना रुग्णाच्या संपर्कातील ११ जणांना स्वॅब तपासणीसाठी शहादा येथील विलगीकरण कक्षात पाठवून क्वारंटाईन करण्यात आले आहे. ग्रामपंचायतीतर्फे गावात फवारणी करण्यात आली. या वेळी पं.स. सदस्या बानूबाई ईशी, देवेंद्र बोरसे, उपसरपंच वासुदेव बोरसे, ग्रामविकास अधिकारी बी.बी. देसले, सदस्य ललीत बोरसे, सुरेश कुवर, पोलीस पाटील अमरदास पाटील उपस्थित होते. सारंगखेडा पोलीस ठाण्याचे पोलीस निरीक्षक चंद्रकांत सरोदे यांच्या मार्गदर्शनाखाली बंदोबस्त ठेवण्यात आला आहे. सारंगखेडा प्राथमिक आरोग्य केंद्राचे प्रयोगशाळा वैज्ञानिक अधिकारी सी.एम. पाटील, डॉ.राकेश पाटील, जे.बी. गिरासे, वाल्मिक बांगर, मीनाबाई निकम, आशा सेविका दीपाली देवरे, सुनंदा भील, सपना कुवर, अंगणवाडी सेविका सुनंदा पवार, ग्रामपंचायत कर्मचारी देविदास कुवर, मनोहर बोरसे, निंबा कुवर आदी उपाययोजनेसाठी परिश्रम घेत आहेत.