नंदुरबार : नाशिक, विरार येथील घटनांच्या पार्श्वभूमीवर जिल्हाधिकारी यांनी तातडीने ऑक्सिजन, फायर व स्ट्रक्चरल ऑडिट करण्यासाठी समितीचे गठण केले आहे. ही समिती सर्व शासकीय व खासगी कोरोना रुग्णांचे तातडीने ऑडिट करून तसा अहवाल प्रशासनाला सादर करणार आहे.
जिल्ह्यात शासकीय व खासगी कोरोना रुग्णालयांची संख्या वाढली आहे. अनेक रुग्णालयांमध्ये आवश्यक सुविधा नसतानाही त्या ठिकाणी कोविड कक्ष सुरू करण्यात आले आहेत. अशा ठिकाणी रुग्ण व त्यांच्या नातेवाइकांचीदेखील मोठ्या प्रमाणावर गर्दी होऊ लागली आहे. त्यामुळे या रुग्णालयांचे ऑक्सिजन, फायर व स्ट्रक्चरल ऑडिट करणे गरजेचे झाले आहे. नाशिक, विरारसारखी दुर्दैवी घटना घडू नये यासाठी आता जिल्हा प्रशासनही सतर्क झाले असून, त्यादृष्टीने पहिले पाऊल म्हणून शासकीय ऑडिट समिती स्थापन करण्यात आली आहे. या समितीमार्फत सर्व शासकीय व खासगी कोविड रुग्णालयांचे ऑडिट केले जाणार आहे.
याबाबत काढण्यात आलेल्या आदेशात म्हटले आहे की, कोरोनाचा प्रादुर्भाव रोखण्यासाठी प्रतिबंधात्मक उपाययोजनेचा एक भाग म्हणून जिल्ह्यात शासकीय व खासगी कोरोना रुग्णालयांना मान्यता देण्यात आली आहे. अशा रुग्णालयांचे ऑक्सिजन, फायर व स्ट्रक्चरल ऑडिट करणे आवश्यक आहे. त्यामुळे जिल्हाधिकाऱ्यांच्या अधिनस्त शासकीय अभियांत्रिकी महाविद्यालये, शासकीय तंत्रनिकेतन, औद्योगिक प्रशिक्षण संस्थांचे प्राचार्य यांची समिती नेमण्यात येत आहे.
जिल्ह्यातील शासकीय तसेच खासगी रुग्णालयात ऑक्सिजन प्रणाली कार्यान्वित असून, ऑक्सिजन नलिकांद्वारे रुग्णांना ऑक्सिजनचा पुरवठा करण्यात येतो. त्यामुळे ऑक्सिजन हा रुग्णांचा जीवनाचा महत्त्वाचा घटक असून त्याचा योग्य प्रकारे वापर होणे आवश्यक आहे. त्याचेच ऑडिट ही समिती करेल.
असे असेल जिल्हास्तरीय रुग्णालयांचे ऑडिट...
n समितीने तांत्रिक मनुष्यबळ उपलब्ध करून देऊन या मनुष्यबळाद्वारे जिल्ह्यातील शासकीय तसेच खासगी रुग्णालयांमधील ऑक्सिजन वायुनलिकांची तसेच संपूर्ण ऑक्सिजन प्रणालीचा कालबद्ध कार्यक्रम आखून तपासणी करून घ्यावी व ऑडिट पूर्ण करून घ्यावे.
n तपासणीच्या वेळी वायुनलिकांमध्ये गळती असल्यास अथवा पुनर्बांधणी करणे आवश्यक असल्यास याबाबतचा अहवाल जिल्हाधिकारी यांच्याकडे सादर करावा. अहवाल विचारात घेऊन शासकीय रुग्णालयात आवश्यक त्या दुरुस्ती करण्यासाठी यथाशीघ्र कार्यवाही करावी.
n खासगी रुग्णालयांबाबत संबंधित रुग्णालयास तातडीने कार्यवाही करण्याच्या सूचना देऊन आवश्यक कार्यवाही होईल याची दक्षता घ्यावी.
n समिती सदस्यांनी ऑक्सिजन ऑडिट, फायर ऑडिट, स्ट्रक्चरल ऑडिटमध्ये निदर्शनास आलेल्या त्रुटींची पूर्तता संबंधित रुग्णालयाच्या प्रमुखांकडून तत्काळ पूर्ण करून घ्याव्यात.
n सर्व शासकीय व खासगी कोरोना हॅास्पिटलप्रमुखांकडून ऑक्सिजन ऑडिट, स्ट्रक्चरल ऑडिटमध्ये निदर्शनास आलेल्या त्रुटीची पूर्तता झाल्याबाबत अहवाल प्राप्त करून त्यांना त्रुटीपूर्तता अहवाल समिती सदस्यांनी सादर करावा.
n समिती सदस्यांनी आवश्यक ते तांत्रिक मनुष्यबळ उपलब्ध करून देणे तसेच त्या अनुषंगाने साहाय्य व समन्वयन तहसीलदार व त्यांच्या अधिनस्त अधिकारी करतील.