कर्मचाऱ्यांना लसीकरणाचे भान मिळाले नंदूरबारला तिसरे स्थान

सुमारे ११ हजार ६०७ शासकीय आणि खासगी वैद्यकीय अधिकारी, तंत्रज्ञ कर्मचारी, आरोग्य कर्मचारी, अंगणवाडी सेविका, आशा यांना कोरोव्हॅक्सीन ही लस दिली जाणार असल्याने त्यांची माहिती ॲपवर भरुन देण्यात आली होती. यातील वयाने कमी आणि शारिरिक क्षमता अधिक सक्षम असलेल्या कर्मचाऱ्यांना जिल्ह्यात प्रथम मान देत लसीकरणाचा प्रारंभ करण्यात आला होता. या लसीकरणाला जिल्ह्यात चार ठिकाणी सुरुवात करण्यात आली होती. परंतु दैनंदिन ४०० लाभार्थींना लस देण्याचे उद्दिष्ट् ठेवण्यात आले होते. परंतू अनेकांनी लसीकरणाला दांडी मारल्याने १०० लस देण्याचे उद्दिष्ट् अपूर्ण राहत असल्याचे दिसून आले होते. यातून आणखी तीन ठिकाणी लसीकरण केंद्र सुरु करण्यात आल्यानंतर दिवसभरात ७०० जणांना लस देण्याचे उद्दिष्ट् समोर आले होते. याची पूर्ती होत असली तरी अद्याप मोठा पल्ला शिल्लक आहे.

अंगणवाडी सेविका आणि मदतनीसांची होतेय जनजागृती

लस घेतल्यानंतर किरकोळ ताप आणि इतर लक्षणे समोर आली आहेत. यातून काही आरोग्य कर्मचारी लस घेण्यासाठी येत नसल्याने दैनंदिन कोटा पूर्ण होण्यास अडचणी येत आहेत. परिणामी आरोग्य विभागाकडून आता अंगणवाडी सेविका आणि मदतनीस यांना लसीकरणासाठी पाचारण करण्याची तयारी करण्यात आली आहे. जिल्ह्यात एकूण २ हजार ४४० अंगणवाडी सेविका आणि मदतनीस आहेत. त्यांच्या लसीकरणाने जिल्ह्यातील लस घेणाऱ्या महिलांची टक्केवारी वाढणार आहे. आरोग्य विभागातील विविध संवर्गात काम करणाऱ्या महिलांनाही लसीकरण करण्याच्या सूचना आहेत.

कोरोना लसींचा दुसरा डोज आरोग्य विभागाला प्राप्त

पहिल्या टप्प्यातील लसीकरण झाल्यानंतर दुसऱ्या टप्प्यातील लसीकरण सुरू होणार आहे. यासाठी दुसऱ्या टप्प्यातील एकूण १० हजार ५०० डोज जिल्ह्याला मिळाले आहेत. यानुसार कामकाज होणार असल्याची माहिती देण्यात आली आहे.

जिल्ह्याला पहिल्या टप्प्यात १२ हजार ५०० डोज देण्यात आले होते. एकूण ११ हजार ६०७ लाभार्थींना हे डोज द्यायचे आहेत. आज अखेरीस जिल्ह्यातून ३ हजार ३६८ जणांचे लसीकरण झाले आहे. पहिल्या टप्प्यातील १२ हजार ५०० आणि दुसऱ्या टप्प्यात १० हजार ५०० अशा एकूण २३ हजार लसींचा साठा सध्या आरोग्य विभागाकडे आहे.

लसीकरणात वाढ करण्यासाठी आरोग्य विभाग सातत्याने प्रयत्न करत असल्याचे सांगण्यात आले आहे. यात प्रामुख्याने आरोग्य कर्मचाऱ्यांचे समुपदेशन करण्यावर भर देण्यात आला आहे.

जिल्ह्यात लसीकरण करण्यासाठी तीन नवीन सेंटर्स काढले आहेत. दर दिवशी ७०० जणांचे लसीकरण होईल असे नियोजन केले आहे. लसीकरण वाढवण्यासाठी सर्वच स्तरावरुन प्रयत्न करत आहोत.

-डाॅ. एन.डी.बोडके,

जिल्हा आरोग्य अधिकारी, नंदूरबार.