पोळ्याच्या पूर्वसंध्येला बाजारपेठेत गर्दी

लोकमत न्यूज नेटवर्क
नंदुरबार : कोरोना आणि लॉकडाऊनमुळे शेतकरी त्रासला असला तरी पोळ्याच्या खरेदीत बळीराजाने कुठलीही कसर सोडली नाही. त्याचा प्रत्येय सोमवारी आला. पोळ्याच्या पूर्वसंध्येला बाजारपेठेत मोठी गर्दी झाली होती. अनेक वेळा वाहतूक देखील ठप्प होत होती.
शेतकऱ्यांच्या दृष्टीने पोळा सणाला मोठे महत्व असते. खरीपातील पिके बहरलेली असतात. अशा कालावधीत येणारा पोळा सण साजरा करण्यासाठी शेतकरी कुठलीही कसर सोडत नाही. आपल्या सर्जा-राजाला सजविण्यासाठी विविध वस्तू खरेदी करतो.
सोमवारी दिवसभरात बाजारात विविध वस्तू खरेदीसाठी मोठी गर्दी झाली. बैलांचा साजला सर्वाधिक मागणी होती. यंदा लॉकडाऊन आणि कोरोनामुळे साज बनविण्याचे प्रमाण कमी राहिले. त्यामुळे साजची टंचाई बाजारात दिसून आली होती.
याशिवाय घरगुती पुजनासाठी मातीचे बैल, रंग यांनाही मागणी होती. किराणा खरेदीला देखील अनेकांनी गर्दी केली होती.
शहरातील सुभाष चौक, अमृत चौक, मंगळबाजार, शास्त्रीमार्केट, हाटदरवाजा, शाळा नंबर एकचा परिसर आदी भागात झालेल्या गर्दीमुळे अनेकवेळा वाहतुकीची कोंडी होत होती. कोंडी सोडविण्यासाठी वाहतूक पोलिसांची दमछाक होत होती. बाजारात पोलिसांचा बंदोबस्त देखील लावण्यात आला होता. गर्दीमुळे सोशल डिस्टन्सिंगचे पालन मात्र कुठेही होतांना दिसून आले नाही.