कोरोनाबाधित रुग्णांचा अहवाल पॉझिटिव्ह आल्यावर लक्षणे असलेल्या रुग्णांना उपचारासाठी दाखल केले जाते व लक्षणे नसलेल्या रुग्णांना पुढील काही दिवसांसाठी होम क्वारंटाईन राहण्यास सांगितले जाते. मात्र, शहरातील व ग्रामीण भागातील लक्षणे नसलेेले रुग्ण बेजबाबदारपणे अनेक ठिकाणी फिरताना आढळून आले आहेत. त्यामुळे कोरोना विषाणूचा संसर्ग वाढण्याची शक्यता आहे. गेल्या चार महिन्यांपूर्वी लक्षणे नसलेल्या रुग्णांना होम क्वारंटाईन शिक्के हातावर मारण्यात येत होते. सध्या ही पद्धत बंद करण्यात आल्याने रुग्ण बेजबाबदारपणे वागत आहेत.
नवापूर शहरात रॅपिड टेस्टिंग व आरपीटीसीआर चाचणी मोहीम सुरू करण्यात आली असून, त्यात शहरातील अनेक नागरिकांचा अहवाल पॉझिटिव्ह येत आहे. दरम्यान, कोरोनाबाधितांना नवापूर उपजिल्हा रुग्णालय व सीनिअर काॅलेजमधील वसतिगृहात क्वारंटाईन करण्यात येऊन त्यांच्यावर उपचार करण्यात येतात. उपचारानंतर रुग्णांना सक्तीने होम क्वारंटाईन करण्यासंबंधीचे आदेश देण्यात येत असताना होम क्वारंटाईनच्या सक्तीला न जुमानता शहरात व ग्रामीण भागातील बाजारात, लग्न समारंभात मुक्त संचार करताना आढळून येत असल्याने चिंतेचा विषय ठरला असून, अशा रुग्णांमुळे अनेक भागात कोरोना विषाणूचा प्रसार होत आहे. प्रशासनाकडून संचारबंदीची कडक अंबलबजावणी सक्तीने करण्याची मागणी नागरिकांकडून होत आहे.
नवापूर शहरातील कोरोना हॉटस्पॉट भागात प्रशासनाने बॅरिकेड लावली आहे. तरीही काही रुग्ण बाहेर फिरताना आढळून येत असल्याने त्यांच्यामुळे अनेकांना धोका उद्भवू शकतो. याबाबत नगरपालिका प्रशासनाने ठोस उपाययोजना करणे गरजेचे आहे. कोरोना पॉझिटिव्ह रुग्णांच्या घराबाहेर सूचना पत्रक किंवा सांकेतिक चिन्हे लावणे गरजेचे आहे.
३१ मार्चला रेकॉर्डब्रेक रुग्ण आढळले
नवापूर तालुक्यात कोरोनाचा उद्रेक होत असून, आतापर्यंत सर्वाधिक १०२ कोरोना पॉझिटिव्ह रुग्ण आढळून आल्याने नागरिकांमध्ये भीतीचे वातावरण निर्माण झाले आहे. नंदुरबार जिल्ह्यात रेकॉर्डब्रेक ८५५ कोरोना रुग्ण आढळून आल्याने प्रशासनाची डोकेदुखी वाढली आहे. कोविड सेंटरमधील बेड फुल्ल असून, कोरोना संक्रमणाचा आलेख चिंताजनक आहे.
नवापूर शहरात नगरपालिका प्रशासन योग्य पद्धतीने कार्यवाही करत आहे. हाॅटस्पाॅट भागात बॅरिकेड्स व कोरोना तपासणी केली आहे. कोरोना पॉझिटिव्ह रुग्ण बाहेर फिरत असल्याची माहिती नगरपालिकेला दिल्यास कारवाई करता येईल. याबाबत पालिका प्रशासन कोरोना परिस्थितीवर लक्ष ठेवून आहे.
-महेश चौधरी, मुख्याधिकारी, नगर पालिका, नवापूर