कोरोनाने मास्क बनले उदरनिर्वाहाचे साधन

कोरोनाच्या साथीपूर्वी मास्कचा वापर अत्यंत कमी प्रमाणात केला जात होता. प्रामुख्याने रुग्णालयातील डॉक्टर आणि आरोग्य कर्मचारी मास्कचा वापर ऑपरेशन थिएटरमध्ये वावरत असताना करत होते. डॉक्टरांशिवाय अथवा आरोग्य कर्मचाऱ्यांशिवाय एखाद्याने मास्क लावल्याचे दिसून आल्यास त्याच्याकडे मोठ्या कुतूहलाने पाहिले जात असे. मात्र, जेव्हा कोरोनाची साथ सुरू झाली तेव्हापासून मास्कचा वापर सर्वांसाठीच बंधनकारक करण्यात आला आहे. त्यामुळे आता सर्व जण घराबाहेर पडताना तोंडाला मास्क लावत असल्याचे दिसून येत आहे. त्यातूनच आता मॅचिंगचे मास्क खरेदी करण्याकडे शहरवासीयांसह ग्रामीण भागात देखील मोठा कल निर्माण झाला आहे.

कोरोनाचा संसर्ग दिवसेंदिवस वाढत चालल्याने आता मास्क वापराकडे जे दुर्लक्ष करतील अशा नागरिकांवर प्रशासनाकडून दंडात्मक कारवाई केली जात आहे. मास्क न वापरणाऱ्यांकडून किमान ५०० रुपये तरी दंड भरावा लागतो. हा दंड टाळण्यासाठी का होईना मास्कचा वापर सक्तीचा झाला आहे.

विविध प्रकारचे मास्क बाजारात उपलब्ध :- सध्या बाजारात विविध डिझाईनचे एन-९५ व विविध कंपन्यांचे दु-लेअर, थ्री लेअर अशा विविध प्रकारचे मास्क उपलब्ध झाले आहेत. पाच रुपयांपासून ते १५० रुपयांपर्यंतचे मास्क विक्रीसाठी उपलब्ध आहेत. तर लहान मुलांसाठी विविध प्रकारच्या आकर्षक अशा कार्टूनचे मास्कही बाजारात आले आहेत. तरुण-तरुणी ही आपल्याला आवडतील अशा वेगवेगळ्या वयोगटानुसार वेगवेगळ्या प्रकारचे मास्क खरेदी करू लागले आहेत.

मास्कमधून रोजगार :- लॉकडाऊनमुळे अनेकांचे रोजगार संपुष्टात आले. तर अनेक महिला बेरोजगार झाल्या. प्रामुख्याने ज्या महिलांना शिवणकाम येते अशा महिलांनी मास्क बनविण्याचा व्यवसाय सुरु केला आहे. घरी विविध प्रकारचे रंगीत कपडे आणून पाहिजे तशा आकाराचे रंगीबेरंगी मास्क शिवून विक्रीसाठी द्यायचे हा व्यवसाय गेल्या वर्षभरापासून जोमाने सुरू झाल्याने मास्क निर्मिती हे अनेकांचे उदरनिर्वाहाचे साधन बनले आहे.