यासाठीचे प्रवेश अर्ज एकात्मिक आदिवासी विकास प्रकल्प कार्यालय, तळोदा येथे विनामूल्य उपलब्ध आहेत. या योजनेचा लाभ घेणारा विद्यार्थी अनुसूचित जमातीचा असावा. अर्जासोबत रहिवासी दाखला, सक्षम अधिकाऱ्याने दिलेल्या जातीच्या दाखल्याची साक्षांकित प्रत, विद्यार्थी दारिद्र्यरेषेखालील असल्यास त्या संबंधित यादीतील अनुक्रमांक नमूद करून दाखल्याची सत्यप्रत, अनाथ अपंग असल्यास त्याबाबतचा दाखला, पालक शासकीय / निमशासकीय सेवेत नसल्याबाबत हमीपत्र, निवड झालेल्या विद्यार्थ्यांची शाळा बदलता येणार नाही. त्याबाबत हमीपत्र जोडणे आवश्यक आहे.
महिला पालक विधवा, घटस्फोटीत, निराधार, परित्यक्त्या असल्यास ग्रामपंचायतीचा दाखला, पालकाचे वार्षिक उत्पन्न एक लाखापेक्षा जास्त नसावे. सन २०१९ - २० वर्षाच्या उत्पन्नाच्या दाखल्याची सत्यप्रत सोबत जोडावी. पहिलीसाठी प्रवेश घेणाऱ्या विद्यार्थ्याचे वय ३० सप्टेंबर २०२१ रोजी सहा वर्ष पूर्ण असावे व त्याचा जन्म १ ऑक्टोबर २०१४ ते ३० सप्टेंबर २०१५ या दरम्यान झालेला असावा.
अर्जासोबत दोन पासपोर्ट फोटो आणि जन्मतारखेचा पुरावा म्हणून ग्रामसेवक - नगरपालिका यांचा ऑनलाईन दाखला जोडावा. विद्यार्थ्याच्या आई - वडिलांच्या आधार कार्डची साक्षांकित प्रत, विद्यार्थ्याचे वैद्यकीय प्रमाणपत्र, इयत्ता दुसरीच्या वर्गात प्रवेशासाठी विद्यार्थी सन २०२० - २१ या शैक्षणिक वर्षामध्ये इयत्ता पहिलीत प्रवेश असल्याबाबतचे बोनाफाईड आदी कागदपत्रेदेखील अर्जासोबत जोडावीत.
सर्व विद्यार्थी व पालकांसाठी अटी, शर्ती व नियम बंधनकारक असून चुकीची माहिती सादर केल्यास प्रवेश रद्द करण्यात येईल. १ मार्च २०२१नंतर प्रवेश अर्ज स्वीकारले जाणार नाहीत, असे प्रकल्प अधिकारी तथा सहा. जिल्हाधिकारी अविशांत पांडा यांनी कळविले आहे.