इटलीत पर्यटनासाठी गेले आणि काळाने गाठले; रस्ते अपघातात नागपूरमधील दाम्पत्याचा मृत्यू

मुलगी गंभीर जखमी : पर्यटनासाठी गेले अन् वज्राघात झाला

लोकमत न्यूज नेटवर्क

नागपूर : इटलीत पर्यटनासाठी गेलेल्या नागपुरातील दाम्पत्याचा रस्ते अपघातात मृत्यू झाला. त्यांनी मुलगी या अपघातात गंभीर जखमी झाली आहे. ग्रोसेटोजवळील राज्य महामार्ग एक ऑरेलियावर हा अपघात झाला. या अपघातात एकूण तीन जणांचा मृत्यू झाला. अपघाताची माहिती मिळताच, संबंधित कुटुंबाचे नातेवाईक शोकाकुल झाले आहेत.

मृत दाम्पत्यामध्ये जावेद अख्तर (५५, सिव्हिल लाइन्स) आणि त्यांची पत्नी नादिरा गुलशन (४७) यांचा समावेश आहे. ते सीताबर्डी येथील हॉटेल गुलशन प्लाझाचे मालक आहेत. त्यांची मोठी मुलगी आरजू अख्तर (२२) हिची प्रकृती गंभीर असल्याचे वृत्त आहे, तर धाकटी मुलगी शिफा अख्तर (२०) आणि मुलगा जाजेल अख्तर (१४) हेही या अपघातात जखमी झाले आहेत. जावेद अख्तर दरवर्षी नवरात्रीत त्यांच्या कुटुंबासह विविध देश-विदेशात प्रवास करत असत. यावेळी ते २३ सप्टेंबर रोजी त्यांची पत्नी नादिरा गुलशन, मोठी मुलगी आरजू अख्तर, धाकटी मुलगी शिफा अख्तर आणि मुलगा जाजेल अख्तर यांच्यासह रोमला रवाना झाले होते. ५ ऑक्टोबर रोजी कुटुंब नागपूरला परतणार होते. गुरुवारी सकाळी इटलीच्या ग्रोसेटाजवळ हे कुटुंब सहलीसाठी निघाले होते, तेव्हा अपघात झाला. उत्तर दिशेकडे जाणाऱ्या कॅरेजवेवर एक व्हॅन आणि आशियाई वंशाच्या पर्यटकांना घेऊन जाणाऱ्या नऊ आसनी मिनीबसचा समावेश होता. व्हॅनमधील तिघांना मदत खूप उशिरा पोहोचली आणि त्यांचा जागीच मृत्यू झाला. याची माहिती मिळताच, कुटुंबातील काही सदस्य इटलीला रवाना झाले आहेत.

मुलाने शुद्धीवर येताच नागपूरला फोन केला

प्राप्त माहितीनुसार, अपघात झाल्यावर मुलगा जाजेल अख्तर कारची खिडकी तोडून कारमधून बाहेर पडला. त्याने साइनबोर्डवर दिलेल्या हेल्पलाइन नंबरवर संपर्क साधला आणि स्थानिक प्रशासनाला अपघाताची माहिती दिली. रात्री ८ वाजण्याच्या सुमारास मुलगा शुद्धीवर आला आणि त्याने ताबडतोब नागपूरमधील त्याच्या नातेवाइकांना फोन करून घटनेची माहिती दिली.

भारतीय दूतावासाचा शोकसंदेश

अख्तर दाम्पत्याच्या मृत्यूनंतर इटलीतील भारतीय दूतावासाने शोकसंदेश जारी केला आहे. या अपघातात मृत्युमुखी पडलेल्या दाम्पत्याला आम्ही श्रद्धांजली अर्पण करतो, तसेच जखमी सदस्य लवकरात लवकर बरे व्हावे, यासाठी प्रयत्न सुरू आहेत. अख्तर कुटुंबीयांशी दूतावास संपर्कात असून, हरतऱ्हेने त्यांचे सहकार्य करण्यात येत असल्याची त्यांनी माहिती दिली.