- ८.३० किमी मार्गावर नऊ स्टेशन
नागपूर : महामेट्रोच्या सीताबर्डी ते प्रजापतीनगर कॉरिडोरचे कार्य वेगात सुरू असून, रिच-४ या मार्गावर रूळ बसविण्यात येत आहेत. या मार्गावर व्हायडक्ट व स्टेशनचे कार्य ९० टक्के पूर्ण झाले आहे.
एकूण ८.३० किमीच्या या मार्गावर कॉटन मार्केट, नागपूर रेल्वे स्टेशन, दोसर वैश्य चौक, अग्रसेन चौक, चितार ओळ, टेलिफोन एक्स्चेंज चौक, आंबेडकर चौक, वैष्णोदेवी चौक, प्रजापतीनगर असे नऊ स्टेशन आहेत. मुख्य म्हणजे या मार्गावर देशातील २३१.२ मीटर लांबीच्या पुलाचे बांधकाम आधुनिक तंत्रज्ञानाचा उपयोग करून आनंद टॉकीज, सीताबर्डी ते कॉटन मार्केटपर्यंत सुरू आहे. भारतीय रेल्वेच्या ट्रॅकवरून १०० मीटरचा एक स्पॅन (३ मीटरचा एक गर्डर) या रेल्वे ट्रॅकवरून राहणार आहे.
नागपूरच्या पूर्व आणि पश्चिम भागांना जोडणारा सेंट्रल एव्हेन्यू हा एक प्रमुख मार्ग आहे. सेंट्रल एव्हेन्यू परिसर व्यावसायिक स्वरूपाचा असल्याने वाहनांचे मोठ्या प्रमाणात आवागमन होते. वाहतुकीच्या गर्दीमुळे प्रकल्प राबविताना मेट्रोने पुरेपूर काळजी घेतली. या मार्गावर प्रवासी सेवा सुरू झाल्यास मेयो हॉस्पिटल, रेल्वेस्थानक, कॉटन मार्केट, इतवारी बाजारपेठ इत्यादी ठिकाणी जाणे सोयीस्कर ठरेल.
या मार्गावर झालेल्या कार्याची आकडेवारी :
पाइल्स १२८४ पैकी १२८४, पाईल कॅप २५० पैकी २५०, पियर २६६ पैकी २६२, पियर कॅप २६५ पैकी २६२, पियर आर्म ४५ पैकी ४५, ट्रॅक आर्म ४४ पैकी ४४, सेग्मेंट कास्टिंग २३९३ पैकी २३९३, स्पॅन इरेक्शन २४९ पैकी २३०, क्रॅश बॅरियर फिक्सिंग २५० पैकी २४३ पूर्ण.