कॉन्फिडन्स ग्रुपची दोन जहाजे होर्मुझ सामुद्रधुनीत अडकली; हॉटेल, रेस्टॉरंटउद्योगावर संकट

Nagpur : मध्यपूर्वेतील संघर्षामुळे केवळ सरकारीच नव्हे, तर खासगी क्षेत्रातील गॅस पुरवठाही मोठ्या संकटात सापडला आहे. नागपूर मुख्यालय असलेल्या आणि देशातील खासगी एलपीजी क्षेत्रातील आघाडीची कंपनी 'कॉन्फिडन्स पेट्रोलियम इंडिया लिमिटेड'ला (सीपीआयएल) कच्च्या मालाच्या पुरवठ्यात मोठ्या अडचणींचा सामना करावा लागत आहे.

लोकमत न्यूज नेटवर्क
नागपूर : मध्यपूर्वेतील संघर्षामुळे केवळ सरकारीच नव्हे, तर खासगी क्षेत्रातील गॅस पुरवठाही मोठ्या संकटात सापडला आहे. नागपूर मुख्यालय असलेल्या आणि देशातील खासगी एलपीजी क्षेत्रातील आघाडीची कंपनी 'कॉन्फिडन्स पेट्रोलियम इंडिया लिमिटेड'ला (सीपीआयएल) कच्च्या मालाच्या पुरवठ्यात मोठ्या अडचणींचा सामना करावा लागत आहे. इराण-इस्रायल वादामुळे निर्माण झालेल्या तणावात कंपनीची दोन महत्त्वाची जहाजे होर्मुझ सामुद्रधुनीत अडकली आहेत.

कॉन्फिडन्स ग्रुपचे अध्यक्ष आणि व्यवस्थापकीय संचालक नितीन खारा यांनी बुधवारी 'लोकमत'शी बोलताना या गंभीर परिस्थितीची माहिती दिली. ते म्हणाले, आमच्या तीन जहाजांपैकी केवळ एक जहाज रत्नागिरी जिल्ह्यातील जयगड बंदरात पोहोचू शकले. उर्वरित दोन जहाजे युद्धजन्य परिस्थितीमुळे होर्मुझ सामुद्रधुनीत अडकली आहेत. देशभरातील आमच्या बॉटलिंग प्लांटमध्ये सध्या केवळ ७ ते ८ दिवस पुरेल इतकाच गॅस साठा शिल्लक आहे.

खारा म्हणाले, एलपीजी वाहून नेणारी जहाजे साठा संपण्यापूर्वी भारतीय किनाऱ्यावर पोहोचतील, अशी आशा आहे. कंपनीचे संपूर्ण भारतात किरकोळ पुरवठा करण्यासाठी २,५०० हून अधिक डीलर्स आहेत. कॉन्फिडन्स ग्रुप 'गो गॅस' या ब्रेड अंतर्गत एलपीजीचे मार्केटिंग करतो. तो मुळात हॉस्पिटॅलिटी उद्योगाला किंवा 'होरेका' सेगमेंटला पुरवठा करतो. ज्यामध्ये हॉटेल्स, रेस्टॉरंट्स आणि कॅफे, कॅटरिंग व्यवसायांचा समावेश आहे. हे एक विशेष, उच्च-प्रमाणातील व्यावसायिक क्षेत्र म्हणून वर्णन केले जाते, जे स्वयंपाक, गरम करणे आणि इतर हॉस्पिटॅलिटी ऑपरेशन्ससाठी एलपीजीच्या सातत्यपूर्ण आणि अनेकदा दैनंदिन पुरवठ्यावर अवलंबून असते.

कॉन्फिडन्स ग्रुपने हॅलिड्रम, आयटीसी लिमिटेड, पिज्झा हट, केएफसी, सेंट-गोबेन, रेमंड ग्रुप आणि अनेक हॉटेल चेनना त्याचे क्लायंट म्हणून सूचीबद्ध केले आहे. ते त्यांच्या ३०९ ऑटो रिफिलिंग स्टेशन्स किंवा ऑटो एलपीजी डिस्पेंसिंग स्टेशन्स (एएलडीएस) नेटवर्कद्वारे ऑटो एलपीजीचा पुरवठादेखील करते. खारा म्हणाले, २५० एएलडीएस अजूनही कार्यरत आहेत आणि कंपनी पुन्हा सुरू करण्याचा प्रयत्न करत आहे. कॉन्फिडन्स ग्रुपचे देशभरात ६८ बॉटलिंग प्लांट आहेत.