रामदासपेठ भागातील भोजनालयाचे शेड तोडले ()

लोकमत न्यूज नेटवर्क

नागपूर : महापालिकेच्या प्रवर्तन विभागाच्या पथकाने मंगळवारी रामदासपेठ भागातील भोजनालयाचे शेड तोडले. लक्ष्मीनगर झोनअंतर्गत सेंटर पॉईंट हॉटेल समोरील गणेश भोजनालय, हरिओम भोजनालय, शंकर भोजनालयाचे शेड तोडले.

त्यानंतर खामला चौक ते छत्रपती चौक, वर्धा रोड, सोमलवाडा फूटपाथवरील २८ अतिक्रमण हटवून एक ट्रक साहित्य जप्त करण्यात आले. मंगळवारी शहरातील विविध झोनने केलेल्या कारवाईत २६२ अतिक्रमणांचा सफाया केला. पाच ट्रक साहित्य जप्त करून २० हजार ७०० रुपये दंड वसूल करण्यात आला.

धरमपेठ झोनमध्ये रामदासपेठ येथील फूटपाथवरील दोन ठेले जप्त केले. सीताबर्डी मेन रोडवरील कापड विक्रेत्यांची दुकाने हटविण्यात आली. झाशी राणी चौक परिसरातील नर्सरी विक्रेत्यांना हटविण्यात आले.

बोले पेट्रोल पंप ते लॉ कॉलेज चौक, रविनगर चौक, विद्यापीठ कॅम्पस दरम्यानच्या फूटपाथवरील भंगार विक्रेत्यांचे अतिक्रमण काढण्यात आले. ११ शेड तोडून ३१ अतिक्रमण काढून एक ट्रक साहित्य जप्त करण्यात आले. पथकाने १४ हजार ५०० रुपये दंड वसूल केला.

हनुमाननगर झोनच्या पथकाने तुकडोजी पुतळा चौक ते क्रीडा चौक, रेशीमबाग चौक, सक्करदरा चौक, छोटा ताजबागपर्यंत तसेच तुकडोजी पुतळा ते न्यू सुभेदार, म्हाळगीनगर चौकापर्यंतचे ५७ अतिक्रमण हटविण्यात आले. एक ट्रक साहित्य जप्त करण्यात आले.

सतरंजीपुरा झोन क्षेत्रातील दहीबाजार पूल ते मारवाडी चौक, नेहरू पुतळा, मस्कासाथ चौक, तबला मार्केट, भारतमाता चौक, गोळीबार चौक, जुना मोटर स्टॅन्ड चौक, जुना भंडारा रोडपर्यंत ७० अतिक्रमण हटविले. एक ट्रक साहित्य जप्त करण्यात आले. आसीनगर झोनच्या पथकाने राणी दुर्गावती चौक ते जयभीम चौक, महेंद्रनगर पर्यंतच्या फूटपाथवरील ३० अतिक्रमण काढले.

...

फूटपाथ विक्रेत्यांवर कारवाईची मोहीम

सायंकाळच्या सुमारास रस्त्याच्या कडेला फूटपाथवर खाद्यपदार्थांचे ठेले, फळ विक्रेत्यांची गर्दी असते. यामुळे रहदारीला बाधा निर्माण होत असल्याने झोन कार्यालयांनी कारवाईसाठी स्वतंत्र पथक गठित केले आहे. आठवड्यात दोन दिवस दुपारी ३ ते रात्री ११ पर्यंत अतिक्रमण कारवाई करण्याचे निर्देश सहायक आयुक्तांना देण्यात आले आहे. मनपा मुख्यालयातील पथकही आठवड्यातून दोन दिवस अशी कारवाई करणार आहे. या पथकासोबत अन्न व औषधी प्रशासन विभागाचे पथक संयुक्त कारवाई करणार आहे.

-