भूमी अभिलेख कर्मचाऱ्यांच्या तांत्रिक वेतनश्रेणीचा प्रस्ताव तत्काळ मार्गी लावा

जमाबंदी आयुक्त एन. के. सुधांशू हे रविभवनात आले असता, विदर्भ भूमी अभिलेख कर्मचारी संघटनेच्या प्रतिनिधी मंडळाने त्यांची भेट घेतली. यावेळी संघटनेच्या पदाधिकाऱ्यांनी कर्मचाऱ्यांच्या विविध मागण्यांवर चर्चा केली. याप्रसंगी संघटनेच्या वतीने सरचिटणीस श्रीराम खिरेकर, अध्यक्ष दिलीप गर्जे यांनी एन. के. सुधाशूं यांना १२ मागण्यांचे निवेदन सादर केले. संघटनेच्या पदाधिकाऱ्यांची चर्चा करताना जमाबंदी आयुक्त म्हणाले की, तांत्रिक वेतनश्रेणीचा प्रस्ताव अंतिम स्वरूपात असून, शासनास लवकरात लवकर सादर करून त्यावर महसूल सचिवांसोबत बैठक लावून सकारात्मक कार्यवाही करण्यात येईल. तसेच ऑनलाईन म्युटेशन, वर्ग तीन व चारच्या पदोन्नती, अनुकंपा नेमणुका, तसेच अन्य मागण्यांवरही चर्चा होणार आहे. त्याचप्रमाणे जिल्हा अधीक्षक पदाच्या पदोन्नतीबाबत सकारात्मक कार्यवाही सुरू असल्याचे त्यांनी सांगितले. याप्रसंगी बाळासाहेब काळे, उपसंचालक भूमी अभिलेख नागपूर, गजानन डाबेराव, जिल्हा अधीक्षक नागपूर, यांच्यासह संघटनेचे निरंजन पवार, प्रदीप मिश्रा, विशाल खरोले, राजेश होले, हरिभाऊ केदार, ईश्वर सावजी, अजय धात्रक, आदी उपस्थित होते.