नागपूर : नागपूर मेट्रो रेल्वे प्रकल्पाची कार्यपद्धती आणि पहिल्या टप्प्याच्या कामाचे फलित म्हणूनच दुसऱ्या टप्प्याच्या कामाला केंद्रीय अर्थसंकल्पात मंजुरी देण्यात आली. ही आमच्यासाठी अभिमानाची बाब आहे. सहा वर्षांपूर्वी स्थापन झालेल्या संस्थेने अभूतपूर्व आणि असामान्य कार्य हा या यशाचा परिणाम आहे. आता अधिक क्षमतेने काम करण्याचा संकल्प स्थापनादिनी करण्यात येत असल्याचे प्रतिपादन महामेट्रोचे व्यवस्थापकीय संचालक डॉ. बृजेश दीक्षित यांनी केले.
महामेट्रोचा सहावा वर्धापनदिन गुरुवारी दीक्षाभूमीसमोरील महामेट्रोच्या गुंज सभागृहात गुरुवारी साजरा करण्यात आला. व्यासपीठावर प्रकल्प संचालक महेशकुमार, वित्त संचालक एस. शिवमाथन आणि रोलिंग स्टॉक संचालक सुनील माथूर उपस्थित होते.
दीक्षित म्हणाले, सहा वर्षात आम्ही अनेक मैलाचे दगड पार केले आणि यशाचे मानकरी ठरलो. आम्हाला मिळालेले काम हा एकप्रकारे आमचा केलेला गौरवच आहे. यामध्ये नवी मुंबईचे उर्वरित काम पूर्ण करण्याच्या जबाबदारी व्यतिरिक्त नाशिक मेट्रोच्या कामाचाही समावेश आहे. ज्या चिकाटीने, संयमाने आणि कर्तव्यतत्पर राहून काम केले आहे त्यापेक्षा अधिक क्षमतेने काम करण्याची गरज आहे. आता तर मेट्रोच्या तिसऱ्या टप्प्याच्या कार्याबद्दलही चर्चा होऊ लागली आहे. नववर्षाच्या पहिल्या तिमाहीत दुसऱ्या टप्प्याच्या कामाचा श्रीगणेशा करण्याचा विश्वास त्यांनी व्यक्त केला. कार्यक्रमात सचिन ढोमणे, आनंद निर्वाण, जुगल किशोर बोरकर, निखिल वानखेडे आणि सुधीर डबीर यांचा शाल व श्रीफळ देऊन सत्कार करण्यात आला. महामेट्राचे कार्यकारी संचालक अनिल कोकाटे यांनी आभार मानले.