लोकमत न्यूज नेटवर्क
नागपूर : कोरोना रुग्णांना आधीच मोठ्या समस्यांना सामारे जावे लागत आहे. एकीकडे बेड उपलब्ध नाहीत. बेड उपलब्ध झालेच तर ऑक्सिजन नाही. रेमेडेसिविर इंजेक्शनसाठी वणवण भटकावे लागत आहे. आता कोरोना रुग्णांचे दागिनेही रुग्णालयातून चोरीला जाऊ लागले आहेत. सेंट्रल एव्हेन्यू आंबेडकर चौक येथील एका खासगी रुग्णालयात हा प्रकार उघडकीस आला आहे. पीडित कुटुंबाने लकडगंज पोलीस ठाण्यात तक्रारसुद्धा दाखल केली आहे.
सोमवारी क्वॉर्टर येथील रहिवासी असलेल्या एका फळ व्यापाऱ्याच्या पत्नीला कोरोना संसर्ग झाल्याने तिला आंबेडकर चौक येथील खासगी रुग्णालयात दाखल करण्यात आले. तिथे तिच्यावर उपचार सुरू हाेते. १६ एप्रिल रोजी दुपारी मुलगा आईसाठी लागणारे इंजेक्शन द्यायला आयसीयूमध्ये गेला. तिथे त्याला आईच्या अंगावरील दागिने दिसून आले नाहीत. त्याने रुग्णालयातील डॉक्टरांना यासंदर्भात विचारणा केली. तेव्हा डॉक्टरांनी समाधानकारक उत्तर दिले नाही. त्यावेळी जास्त विचारपूस करणे मुलाला योग्य वाटले नाही. १७ एप्रिल रोजी पहाटे संबंधित व्यापाऱ्याच्या पत्नीचा मृत्यू झाला. त्यानंतर मात्र पीडित कुटुंबाने लकडगंज पोलीस ठाण्यात तक्रार दाखल केली.
याचप्रकारची घटना दोन दिवसांपूर्वी मेयो रुग्णालयात घडली होती. कोरोना संसर्गित रुग्णाचा मृत्यू झाल्यावर मृतदेह कुटुंबाला सोपवला जात नाही. मनपा कर्मचारी मृतदेह थेट स्मशानभूमीवर घेऊन जातात. तिथे मनपा कर्मचारीच मृतदेहावर अंत्यसंस्कार करतात. मृताचे कुटुंबीय आपल्या दु:खात असतात. भीतीमुळे परिवारातील एखाद दुसरा सदस्यच घाटावर येतो. त्यावेळी रुग्णाच्या शरीरावर दागिने असल्याचे कुणाच्या लक्षातही राहत नाही. खरा प्रकार लक्षात आलाच तर पोलीस किंवा डॉक्टरांकडे तक्रार करण्याची हिंमतही कुणी करीत नाही. दोन-चार दिवस उलटल्यावर सर्वकाही सामान्य होते. फळ व्यापाऱ्यालासुद्धा पत्नीच्या मृत्यूनंतर याच अवस्थेतून जावे लागले. परंतु संबंधित डॉक्टरांकडून उपचारात निष्काळजी केली जात असल्याची बाब काही लोकांनी सांगितली तेव्हा त्यांनी लगेच तक्रार दाखल केली. लकडगंजचे पीआय पराग पोटे यांनी तक्रारीची पुष्टी करीत तातडीने कारवाई केली जाणार असल्याचे सांगितले.