इंदूरच्या धर्तीवर मनपाचा प्रस्ताव बारगळला
लोकमत न्यूज नेटवर्क
नागपूर : स्वच्छ शहरांच्या यादीत अव्वल क्रमांक मिळण्यासाठी स्वच्छ व सुंदर नागपूर ही संकल्पना प्रत्यक्षात उतरविण्याची गरज विचारात घेता, इंदूर शहराच्या धर्तीवर नागपूर महापालिका प्रत्येक झोनस्तरावर कचरा संकलनासाठी हायटेक ट्रान्सफर स्टेशन उभारण्याचा प्रस्ताव होता. यासाठी यासाठी शहरात जागांचा शोधही घेतला होता. मात्र हा प्रस्ताव बारगळला आहे.
ट्रान्सफर स्टेशनसाठी जवळपास एक एकर जागेची आवश्यकता आहे. लकडगंज झोन वगळता अन्य झोनमध्ये महापालिकेच्या जागा उपलब्ध नाही. त्यामुळे नासुप्र, कृषी विद्यापीठ तसेच महसूल विभागाच्या जागा ताब्यात घेण्याचा विचार होता. गाडीतील ओला व सुका कचरा थेट कंटेनरमध्ये टाकण्याची व्यवस्था निर्माण केली जाणार होती. यासाठी मनुष्यबळ कमी लागणार असल्याने भविष्यात कचरा संकलनाच्या खर्चात मोठ्या प्रमाणात बचत होणार असल्याचा दावा मनपा प्रशासनाकडून करण्यात आला होता.
यासाठी आधुनिक तंत्रज्ञानाचा वापर होणार असल्याने परिसरातील नागरिकांना कोणत्याही स्वरूपाचा त्रास होणार नाही. ओला आणि सुका कचरा वाहून नेण्यासाठी विशिष्ट प्रकारच्या कंटेनरचा वापर केला जाणार असल्याचे सांगण्यात आले होते. मात्र हा प्रस्ताव कागदावरच राहिला.
सध्या शहरातील घराघरातून गोळा केलेला कचरा साठविण्याची व्यवस्था नसल्याने तो भांडेवाडी येथे वाहून नेला जातो. कचरा साठविण्यासाठी प्रशस्त जागा उपलब्ध नसल्याने काही प्रभागात तो रस्त्यावर जमा केला जातो. दुपारपर्यंत तो तसाच पडून असतो. त्यानंतर कंटेनरच्या माध्यमातून भांडेवाडी येथे नेला जातो. दुर्गंधीमुळे नागरिकांना त्रास होतो.
नासुप्रकडे केली होती जागांची मागणी
ट्रान्सफर स्टेशनसाठी मोठी जागा लागणार आहे. शहरात महापालिकेकडे अशा स्वरूपाच्या जागा उपलब्ध नाही. त्यामुळे नासुप्रने आपल्या मालकीच्या जागा उपलब्ध कराव्यात. अशी मागणी महापालिकेने केली होती. तसेच
कृषी विद्यापीठ व महसूल विभागाकडे जागांची मागणी केली जाणार होती.