लाचखोर माळी यांना सशर्त जामीन

अडीच लाखांच्या लाच प्रकरणातील आरोपी सदर पोलीस ठाण्याचे निरीक्षक अरुण माळी यांना लाचलुचपत प्रतिबंधक कायद्याचे विशेष न्यायाधीश टी. एम. लालवाणी यांच्या न्यायालयाने ५० हजाराच्या रोख

नागपूर : अडीच लाखांच्या लाच प्रकरणातील आरोपी सदर पोलीस ठाण्याचे निरीक्षक अरुण माळी यांना लाचलुचपत प्रतिबंधक कायद्याचे विशेष न्यायाधीश टी. एम. लालवाणी यांच्या न्यायालयाने ५० हजाराच्या रोख मुचलक्यावर सशर्त जामीन मंजूर केला.
अवस्थीनगर येथील डेव्हलपर व बिल्डर शकीलबाबू वल्द छोटू साहाब यांच्या तक्रारीवरून शनिवारी लाचलुचपत प्रतिबंधक विभागाच्या पथकाने सापळ्याची कारवाई केली होती.
माळी याच्यावतीने अडीच लाखांची लाच घेताना त्यांचा रायटर मनोहर निमजे याला रंगेहात अटक करण्यात आली होती. दुसऱ्या दिवशी या दोघांचा दोन दिवसांचा पोलीस कोठडी रिमांड घेण्यात आला होता. पोलीस कोठडीचा आदेश होऊन माळी यांना न्यायालयाच्या बाहेर आणण्यात आले असता किन्नर आणि विदर्भवाद्यांनी त्यांच्यावर हल्ला करून त्यांना काळी व निळी शाई फासली होती.
माळी हे पोलीस कोठडी रिमांडमध्ये असतानाच छातीत दुखत असल्याच्या तक्रारीवरून मेडिकल कॉलेज इस्पितळाच्या अतिदक्षता विभागात दाखल करण्यात आले होते. परंतु लोकमतने त्यांच्या व्हीआयपी ट्रीटमेंटचे वृत्त प्रसिद्ध करताच वैद्यकीय अधिकाऱ्यांनी दुसऱ्या दिवशीच त्यांना सुटी देऊन टाकली होती.
बुधवारी त्यांना तपास अधिकारी पोलीस उपअधीक्षक चंद्रशेखर बहादुरे यांनी न्यायालयात हजर केले असता न्यायालयाने न्यायालयीन कोठडी रिमांड सुनावून त्यांची कारागृहाकडे रवानगी केली होती. दरम्यान माळी यांच्या वकिलांनी न्यायालयात जामीन अर्ज दाखल केला होता. त्यावर गुरुवारी सुनावणी झाली.सरकार पक्षाने जामिनास विरोध केला तर बचाव पक्षाने अटींसह जामीन देण्यात यावा, अशी विनंती केली होती. न्यायालयाने दोन्ही बाजू एकून आरोपीला सशर्त जामीन मंजूर केला.
शर्तीप्रमाणे त्यांना दोन महिनेपर्यंत सोमवारी लाचलुचपत प्रतिबंधक विभागात हजेरी द्यावी लागेल. या प्रकरणातील दुसरे आरोपी मनोहर निमजे यांचा मंगळवारीच जामीन झालेला आहे.
माळी यांच्या जामिनाचे ५० हजार रुपये मोनू सिद्दीकी नावाच्या व्यक्तीने न्यायालयात भरले. न्यायालयात आरोपीच्या वतीने अ‍ॅड. कुरेशी, अ‍ॅड. सतीश उके तर सरकारच्या वतीने अतिरिक्त सरकारी वकील गिरीश दुबे यांनी काम पाहिले. (प्रतिनिधी)