नागपूर : रेल्वे सुरक्षा दलाने रेल्वे पार्सल कार्यालयातून ३६ लाख रुपये किमतीच्या सिगारेट जप्त करून अज्ञात आरोपीविरुद्ध गुन्हा दाखल केला आहे.
रविवारी सकाळी ८ वाजता आरपीएफचे जवान दीपक पवार, जसविर सिंह यांनी नागपूर रेल्वेस्थानकाच्या प्लॅटफार्म क्रमांक ८ वर मुंबई एण्डकडील भागात पार्सल कार्यालयाजवळ पार्सलमधून सिगारेटच्या तंबाखूसारखा वास येत असल्याची सूचना दिली. त्यावर निरीक्षक आर. एल. मीना, सहायक उपनिरीक्षक रामनिवास यादव हे घटनास्थळी पोहोचले. त्यांनी मुख्य पार्सल पर्यवेक्षक अतुल श्रीवास्तव यांना बोलावून संयुक्तरीत्या पार्सल उघडून तपासणी केली. यावेळी १५ पोत्यांत ३० कार्टून (एका पोत्यात २ कार्टून) आढळले. एका कार्टूनमध्ये ६० बंडल याप्रमाणे एका बंडलमध्ये सिगारेटची २० पाकिटे आढळली. त्याची किंमत ३६ लाख रुपये आहे. या पार्सलसोबत ५ मार्चच्या तारखेची पावती मिळाली. यात या पार्सलमध्ये लेदर असल्याचा उल्लेख करण्यात आला होता. हे पार्सल अंबाळावरून कल्याणसाठी बुक करून ते ०८२३८ अंबाळा-बिलासपूर एक्स्प्रेसने ७ मार्चला नागपूरला आणण्यात आले. कारवाईदरम्यान कोणीही या पार्सलवर आपला हक्क सांगितला नाही. रेल्वे सुरक्षा दलाने सिगारेट जप्त करून पार्सलमध्ये आढळलेल्या पावतीच्या आधारे पार्सलच्या नावावर सिगारेटची वाहतूक केल्याबद्दल अज्ञात आरोपीविरुद्ध रेल्वे अॅक्टनुसार गुन्हा दाखल केला आहे. तपास सहायक उपनिरीक्षक रामनिवास यादव करीत आहेत. ही कारवाई वरिष्ठ विभागीय सुरक्षा आयुक्त आशुतोष पांडे यांच्या मार्गदर्शनाखाली करण्यात आली.
...............