नागपूर : धावत्या रेल्वेगाडीत प्रवाशाचे पाकीट चोरी करणाऱ्या आरोपीला मोतीबाग रेल्वे सुरक्षा दलाच्या जवानांनी रंगेहात पकडले आहे.
रविवारी रेल्वेगाडी क्रमांक ०८२४४ बनारस-बिलासपूर विशेष रेल्वेगाडीत नागपूरवरून दुर्गपर्यंत मोतीबाग रेल्वे सुरक्षा दलाचे जवान गस्त घालत होते. ही गाडी गोंदियाला पहाटे ४.३० वाजता पोहोचल्यानंतर एक व्यक्ती संशयास्पद स्थितीत बाथरुममध्ये जाताना दिसला. शंका आल्यामुळे त्याला थांबवून विचारणा केली असता त्याने माहिती देण्यास नकार दिला. त्यानंतर त्याने आरक्षणाचे तिकीट काढून प्रवास करीत असल्याचे सांगितले. त्याने आपले नाव धर्मेंद्र कुमार सोनी (४९) रा. गोला रोड, रामजयपालनगर, पाटणा बिहार असे सांगितले. संशयाच्या आधारे त्याची तपासणी केली असता त्याच्याजवळ एक पाकीट आढळले. त्यात दोन हजार रुपये रोख आणि देवेंद्र वैष्णव या व्यक्तीचे ड्रायव्हिंग लायसन्स होते. आरपीएफ जवानांनी झोपेतील प्रवाशांना उठवून त्यांचे सामान तपासण्यास सांगितले असता, कोच क्रमांक ३ मधील प्रवासी देवेंद्र वैष्णवने त्याच्या ट्रॉलीबॅगमधून पाकीट चोरीला गेल्याचे सांगितले. ते आपल्या कुटुंबासह उज्जैन ते रायपूर असा प्रवास करीत होते. तक्रार मिळाल्यानंतर आरोपीस अटक करण्यात आली. धावत्या रेल्वेगाडीत प्रवाशांचे साहित्य चोरी करीत असल्याची कबुली आरोपीने दिली आहे. दुर्ग लोहमार्ग पोलिसांनी हा गुन्हा गोंदिया लोहमार्ग पोलिसांकडे पाठविला आहे. ही कारवाई आरपीएफचे सहायक उपनिरीक्षक मोहनलाल, शिपाई संदीप बांते, अमित राठी, विनय यादव यांनी केली.
...........