Nagpur Crime : ब्लॅकमेल करून लावले तरुणीचे लग्न ! अश्लील व्हिडीओ तयार करून रचला कट

Nagpur : एका तरुणीला अश्लील व्हिडीओचा वापर करून ब्लॅकमेल करीत तिचे बळजबरीने लग्न लावून दिल्याचा एक प्रकार उघडकीस आला आहे. कपिल नगर पोलिस ठाण्याच्या हद्दीत ही घटना घडली.

लोकमत न्यूज नेटवर्क
नागपूर : एका तरुणीला अश्लील व्हिडीओचा वापर करून ब्लॅकमेल करीत तिचे बळजबरीने लग्न लावून दिल्याचा एक प्रकार उघडकीस आला आहे. कपिल नगर पोलिस ठाण्याच्या हद्दीत ही घटना घडली. मुश्ताक असे मुख्य आरोपीचे नाव आहे. पीडित तरुणी आणि मुश्ताकची अनेक वर्षांची ओळख आहे.

नोव्हेंबर २०२५ मध्ये, मुश्ताकने तिला पिवळी नदी परिसरात बोलावले. तिथून तो तिला आपल्या आत्याच्या घरी घेऊन गेला, जिथे त्याने तिच्याशी बळजबरीने शारीरिक संबंध प्रस्थापित केले. या घटनेदरम्यान, राजा शेख आणि त्याच्या एका मित्राने या कृत्याचा व्हिडीओ चित्रित केला. हा व्हिडीओ व्हायरल करण्याची धमकी देऊन त्यांनी पीडितेला मुश्ताकशी लग्न करण्यासाठी भाग पाडले. त्यांच्या दबावाला बळी पडून, पीडितेने मुश्ताकशी लग्न केले. त्यानंतर, जेव्हा पीडितेची मासिक पाळी सुरू झाली, तेव्हा तिला आरोपींपैकी एका व्यक्तीकडे नेण्यात आले. तिथे तिच्यावर 'काळ्या जादू'चे विधी केल्याचा तिने आरोप केला आहे. या घटनेनंतर तरुणीचा शारीरिक व मानसिक छळ करण्यात आला. 

अखेर तिने कपिल नगर पोलिस ठाण्यात धाव घेतली. पोलिसांनी छळ आणि जादूटोणा विरोधी कायद्यांतर्गत गुन्हा दाखल केला आहे. मुश्ताकला अटक करण्यात आली असून, इतरांचा शोध सुरू आहे. नोव्हेंबर महिन्यात जेव्हा पीडित तरुणी बेपत्ता झाली होती, तेव्हा तिच्या कुटुंबीयांनी पोलिस ठाण्यात 'बेपत्ता' झाल्याची तक्रार दाखल केली होती. अवघ्या काही दिवसांनंतर पीडित तरुणी परतली; मात्र, तोपर्यंत तिचे लग्न झालेले होते. पोलिसांनी विचारणा केली असता, पीडितेने मुश्ताककडे किंवा स्वतःच्या कुटुंबीयांकडे कोणाकडेही परत जाण्यास नकार दिला. तिला एका महिला सुधारगृहात (महिला आश्रयगृहात) पाठविण्यात आले.