- भक्ती बिसुरेपासष्टीचे सुमंत काका. मुलं परदेशात असतात. पत्नी गेली त्याला आता बरीच वर्षे झाली. आता या वयात एकटं घर खायला उठतं म्हणून त्यांना जोडीदार हवा आहे; पण अशी जोडीदार शोधणं काही साधी गोष्ट नाही. ज्येष्ठांसाठीच्या मॅचमेकिंग क्लबचा सध्या सर्वत्र सुळसुळाट आहे. एका क्लबमध्ये काका दुसऱ्या लग्नासाठी नाव नोंदवायला गेले. नाव नोंदवण्यासाठी पैसे भरले. मग विवाहइच्छुक महिलांच्या फोटोंच्या अल्बमची चलतचित्रं त्यांच्यापुढे ठेवण्यात आली. 'फोटो पाहा. त्यातून पाच प्रोफाइल्स निवडा. त्या पाच जणींना प्रत्यक्ष भेटण्यासाठी अमुक एवढे हजार भरा...' तेवढे हजार भरून काही दिवसांनी काका फॉलोअप घ्यायला गेले तेव्हा 'त्या' पाचही जणींनी तुम्हाला 'रिजेक्ट' केलंय, आता नवीन पाच प्रोफाइल्स निवडण्यासाठी पुन्हा अमुक एवढे हजार भरा...' असं सांगण्यात आलं. आणि काकांच्या मनात शंकेची पाल चुकचुकली.
सुमंत काकांना शंका आली, त्यामुळे ते फार पुढे गेले नाहीत आणि मोठी फसवणूक टळली; पण सगळ्याच ज्येष्ठ नागरिकांच्या नशिबात हे नसतं. आर्थिक फटका तर बसतोच, शिवाय मानसिक ताण वाट्याला येतो, तो वेगळाच!
ज्येष्ठ नागरिक, खासकरून पुरुष नव्याने जोडीदाराच्या शोधात असताना लाखो रुपयांना फसवले जातात. अशी अनेक उदाहरणं सध्या आजूबाजूला दिसतात. सोशल मीडियाने तर असं फसवणं आणि फसवणं खूपच सोपं करून ठेवलंय. सायबर स्कॅम्समध्ये होणारी फसवणूक असेल की, हनिट्रॅपसारख्या गोष्टींमध्ये अडकवून लुबाडणं, ज्येष्ठ नागरिक सध्या सॉफ्ट टार्गेट आहेत. दुसऱ्या जोडीदाराचा विचार करणाऱ्या सामाजिक आणि आर्थिक स्तरातल्या ज्येष्ठांपैकी बहुतेकांकडे बऱ्यापैकी पैसा आणि प्रॉपर्टीही आहे. म्हणूनच जोडीदार शोधण्याची वाट एकट्याने चोखाळणं काही शहाणपणाचं नाही.
पुण्यातल्या 'ज्येष्ठ नागरिक लिव्ह इन रिलेशनशिप' मंडळाचे संस्थापक माधव दामले सांगतात, 'आमच्याकडे येणारे काही सधन ज्येष्ठ पूर्वी लाखभर रुपयांना फसून आलेले आहेत. 'सेकंड इनिंग'साठी जोडीदाराचा शोध घेणं आणि त्यातील संभाव्य फसवणूक टाळणं हे कर्मकठीण आहे. त्यामुळे विश्वासू मध्यस्थ असेल तरच हा मार्ग पत्करावा असा सल्ला मी देतो. आमच्याकडे नाव नोंदणीसाठी येणाऱ्या ज्येष्ठांबाबत आम्ही अनेक प्रकारची 'व्हेरिफिकेशन्स' करतो, त्यात पोलिस व्हेरिफिकेशनचा समावेश आहेच; पण घटस्फोट असेल तर त्याची कागदपत्रं तपासणे, वैद्यकीय माहिती, माहिती असलेले-नसलेले आजार, आर्थिक व्यवहार, वारसा हक्कविषयक तरतुदी, दुसरं लग्न किंवा लिव्ह इन टिकलं नाही तर पुरुष आपल्या जोडीदार महिलेच्या भविष्यासाठी काय तरतूद करायला तयार आहेत, अशा अनेक गोष्टी आम्ही पाहतो. एकूणातच काय, तर साठी-सत्तरीत पुनर्विवाहाचा निर्णय घेणं हे सोपं वाटत असलं, तरी तो निर्णय निभावणं अजिबातच सोपं नसतं. 'हे एकट्या माणसाचं काम नाही. एकट्याने ही वाट चोखाळायचं ठरवलं तर मात्र अपेक्षाभंग आणि फसवणूकच होण्याची शक्यता अधिक' असा इशारा माधव दामले देतात.
Web Summary : Elderly individuals seeking partners are vulnerable to scams via matchmaking services and online platforms. Experts advise thorough verification and caution against navigating this process alone, emphasizing the importance of trusted intermediaries to avoid financial and emotional distress.
Web Summary : जीवनसाथी की तलाश कर रहे बुजुर्ग मैचमेकिंग सेवाओं और ऑनलाइन प्लेटफॉर्म के माध्यम से घोटालों के प्रति संवेदनशील हैं। विशेषज्ञ पूरी तरह से सत्यापन और अकेले इस प्रक्रिया को नेविगेट करने के खिलाफ सावधानी बरतने की सलाह देते हैं।