दोन्ही राष्ट्रवादींचे विलिनीकरण होणार की नाही? प्रफुल पटेलांचं दिल्लीत मोठं विधान, पहिल्यांदाच मांडली भूमिका 

Praful patel on ncp merger: अजित पवारांच्या मृत्युनंतर दोन्ही राष्ट्रवादी काँग्रेसचे विलिनीकरण करण्याचा मुद्दा महाराष्ट्राच्या राजकारणात केंद्रस्थानी आला आहे. त्यावर राष्ट्रीय कार्याध्यक्ष प्रफुल पटेल यांनी स्पष्ट भूमिका मांडली. 

Praful patel on ncp merger rumors maharashtra: अजित पवारांचे निधन झाले. त्यानंतर दोन्ही राष्ट्रवादी काँग्रेस एकत्र आणण्यासाठी चर्चा झाली होती. अजित पवारांची तशी इच्छा होती. विलिनीकरणाचा निर्णय झाला होता, असा दावा राष्ट्रवादी काँग्रेस (शरद पवार) पक्षाच्या नेत्यांकडून करण्यात आला. त्याबद्दल राष्ट्रवादी काँग्रेस (अजित पवार) पक्षाच्या राज्यातील नेत्यांनी असे काही झालेले नाही अशी भूमिका मांडली. याबद्दल पक्षाचे राष्ट्रीय कार्याध्यक्ष प्रफुल पटेल यांना विचारण्यात आले. त्यावर त्यांनी विलिनीकरण होणार की नाही, यावर स्पष्ट मत मांडले. 

दिल्लीत राष्ट्रवादी काँग्रेस (अजित पवार) पक्षाचे राष्ट्रीय कार्याध्यक्ष प्रफुल पटेल यांनी माध्यमांशी संवाद साधला. 

विलिनीकरणाच्या मुद्द्यावर प्रफुल पटेल म्हणाले, "आमचा पक्ष आहे की नाही? पुढे काय करायचे तो विषय नंतरचा. आज राष्ट्रवादी काँग्रेस (अजित पवार) पक्ष जसा आहे, त्याचा निर्णय घेण्याची प्रक्रिया आम्ही करायची की इतरांनी करायची? आमचे निर्णय घेत असताना, मी राष्ट्रीय कार्याध्यक्ष आहे. त्याची जबाबदारी माझ्यावर आहे की नाही? अजित पवारांनंतर कोण? हे करण्याची जबाबदारी माझ्यावर आहे म्हणून मी समोर दिसतो. म्हणून मला समोर राहावं लागते. सुनील तटकरे महाराष्ट्राचे अध्यक्ष आहेत म्हणून त्यांना समोर राहावं लागते", असे भाष्य त्यांनी केले.  

मी अध्यक्षपदाच्या स्पर्धेत नाही

राष्ट्रवादी काँग्रेसचा पुढचा राष्ट्रीय अध्यक्ष कोण, या प्रश्नावर प्रफुल पटेल म्हणाले, "ही प्रक्रिया पूर्ण करण्याची जबाबदारी अजित पवारांनंतर जी लोक पदांवर आहेत, त्यांच्यावर आहे. म्हणून मी काम करत असताना माझी प्राथमिक जबाबदारी आहे की, आमच्या विधिमंडळ गटनेता आणि उपमुख्यमंत्री कोण असेल, त्याचे पद भरायचे. ते झाले. आता राष्ट्रीय अध्यक्ष पदाचा जो विषय आहे, त्याच्यासाठी पक्षाची बैठक बोलवावी लागते. त्यामध्ये आम्हाला विधिमंडळ बैठक बोलवावी लागते. आम्हाला आमच्या पक्षाच्या नेत्यांचा, जनभावनेचा आदर करून निर्णय घ्यायचा आहे. मी प्रफुल पटेल अध्यक्षपदाच्या स्पर्धेत नाही." 

"आम्हाला आमच्या पद्धतीने करू द्या ना. सुनेत्रा पवार, अजित पवार यांच्या कुटुंबाबद्दल आम्हाला सन्मान आणि आदर आहे. कोणालाही शंका, परंतु करण्याचे कारण राहणार नाही", असेही पटेल यावेळी म्हणाले.  

विलिनीकरण होणार की नाही? पटेल म्हणाले...

विलिनीकरणाच्या मुद्द्यावर पुन्हा प्रफुल पटेल यांना प्रश्न विचारण्यात आला. त्यावर ते म्हणाले की, "मी आज जो माझा पक्ष आहे, त्याबद्दलच बोलणार. काल्पनिक कुठल्याही गोष्टी करणार नाही", असे सांगत प्रफुल पटेल यांनी विलिनीकरण होणार नाही असेच अप्रत्यक्षपणे सांगितले.

"मी एवढंच सांगू इच्छितो की, मी त्यांच्यासोबतचा पदाचा विचार करता सर्वात ज्येष्ठ सहकारी होतो, हे तर मान्य करावं लागेल. माझी भूमिका अजित पवारांच्या सुसंगतच राहिली आहे. २०२३ मध्ये जो निर्णय केला, तेव्हा अजित पवारांसोबत राहिलो. सुनील तटकरे, भुजबळ, दिलीप वळसे पाटील, हसन मुश्रीफ आणि सगळे ज्येष्ठ नेते, आमदार राहिले. त्यामुळे अजित पवारांच्या नेतृत्वाखाली राष्ट्रवादी चालली होती. आमच्यामध्ये जी काही निर्णय घेण्याची प्रक्रिया आहे, ती आमच्या पक्षापुरतीच मर्यादित राहणार आहे. आम्ही ज्या काही गोष्टी आहे, माझ्या मते त्यावर आता चर्चा करणे योग्य नाही", असे पटेल विलिनीकरणाच्या मुद्द्यावर बोलले.