भरती-ओहोटीचे सर्वेक्षण वाढवणवासियांनी उधळले; आयटीडीसी पथकाला पिटाळले

या प्रस्तावित बंदरासाठी वाढवण, वरोर समुद्रकिनाऱ्यावरील भरावाचे कॉन्ट्रॅक्ट आयटीडीसी या नामांकित कंपनीला मिळाले आहे. 

डहाणू : डहाणूच्या पश्चिम किनारपट्टीवरील प्रस्तावित वाढवण बंदर प्रकल्पासाठी शासकीय हालचालींना पुन्हा वेग आला आहे. त्यानिमित्ताने वाढवण-वरोर समुद्रकिनाऱ्यावर भरती-ओहोटी रेषेचे बुधवारी ड्रोनद्वारेे केलेे जाणारे सर्वेक्षण उधळून लावण्यात आले. सर्वेक्षणासाठी भल्या पहाटे प्रचंड पोलिस बंदोबस्तात आलेल्या आयटीडीसीच्या सर्वेक्षण पथकास वाढवण आणि  परिसरातील ग्रामस्थांसह बंदर विरोधी संघर्ष समितीच्या कार्यकर्त्यांनी जोरदार घोषणाबाजी करीत अक्षरश: पिटाळून लावले.

या प्रस्तावित बंदरासाठी वाढवण, वरोर समुद्रकिनाऱ्यावरील भरावाचे कॉन्ट्रॅक्ट आयटीडीसी या नामांकित कंपनीला मिळाले आहे. 

कंपनीतर्फे येथील पर्यावरणीय स्थिती जाणून घेऊन त्याप्रमाणे आराखडा बनण्यासाठी समुद्राला पाच दिवस येणाऱ्या मोठ्या भरती-ओहोटीचे ड्रोनद्वारे सर्वेक्षण होणार आहे, अशी माहिती स्थानिक भूमिपुत्रांना मिळताच त्यांनी वाढवण बंदर विरोधी संघर्ष समितीच्या कार्यकर्त्यांसह घटनास्थळी धाव घेत पथकावर प्रश्नांची सरबत्ती केली. कागदपत्रांचीही मागणी केली. तसेच त्यांचे काम उधळून लावत त्यांना पिटाळून लावले.

शासनाचे नागरी विरोधाकडे दुर्लक्ष

प्रस्तावित वाढवण बंदर हे जगातील सर्वांत मोठे दहापैकी एक बंदर ठरणार असून, पंतप्रधान नरेंद्र मोदी यांच्या संकल्पनेतला महत्त्वाकांक्षी प्रकल्प समजला जातो. या प्रकल्पात केंद्राची ७४ टक्के, तर राज्य सरकारची २६ टक्के भागीदारी आहे. 

हे बंदर जवाहरलाल नेहरू पोर्ट ऑथोरिटीद्वारे उभारणार असल्याने त्यांनी आवश्यक असणारी निरनिराळी कंत्राटे वेगवेगळ्या कंपन्यांना  दिलेली आहेत; परंतु या वाढवण बंदरामुळे येथील पर्यावरण, मासेमारी व्यवसाय, तसेच समुद्री जीवसृष्टीला धोका निर्माण होणार असल्याने अनेक वर्षांपासून या प्रकल्पाला येथील नागरिकांकडून कडाडून विरोध होत आहे.

किनारपट्टीवर पोलिस छावणी

दरम्यान, हे सर्वेक्षण होणार असल्याने पालघर पोलिसांनी बुधवारी चिंचणीपासून ते डहाणूखाडीपर्यंतच्या परिसरात नाक्या-नाक्यावर पोलिस बंदोबस्त ठेवला होता. त्यामुळे किनारपट्टीला पोलिस छावणीचे स्वरूप आले होते.