प्रियंकाच्या आत्महत्येप्रकरणी तीन मैत्रिणींना अटक

डॉ. उल्हास पाटील वैद्यकीय महाविद्यालयातील एमबीबीएसची विद्यार्थिनी प्रियंका मुखर्जी हिचा छळ करीत तिला आत्महत्या करण्यास प्रवृत्त केल्याप्रकरणी तीन मैत्रिणींना अटक करण्यात आली आहे

जळगाव : डॉ. उल्हास पाटील वैद्यकीय महाविद्यालयातील एमबीबीएसची विद्यार्थिनी प्रियंका मुखर्जी हिचा छळ करीत तिला आत्महत्या करण्यास प्रवृत्त केल्याप्रकरणी तीन मैत्रिणींना अटक करण्यात आली आहे. या वेळी प्रियंकाच्या वडिलांनी महाविद्यालयाचे चेअरमन डॉ. उल्हास पाटील यांच्यावर गुन्हा दाखल करण्याची मागणी केल्याने पोलीस ठाण्यात तणावाचे वातावरण निर्माण झाले होते. पश्चिम बंगाल राज्यातील केतिका, कुयरीपाडा येथील प्रियंका नयन मुखर्जी हिने २५ सप्टेंबर २०१३ रोजी डॉ. उल्हास पाटील वैद्यकीय महाविद्यालयात एमबीबीएसच्या पहिल्या वर्षाला प्रवेश घेतला. महाविद्यालयाच्या वसतिगृहातील खोली नं. जी-१२मध्ये तिच्यासोबत प्रियंका जयप्रकाश काबरा (रा. जालना), प्रिया दीपक पवार (रा. वर्धा), स्नेहल रमेश महाजन (रा. कळंबोली, नवी मुंबई) या राहत होत्या. दरम्यान, प्रियंकाला तिच्या खोलीतील वर्गमैत्रिणी ‘तुम बंगाली लोगो को हिंदी के सिवा कुछ नही आता. हम मराठी है, हमसे मराठी मे बात किया करो’ असे म्हणून हिणवत असल्याचा आरोप फिर्यादीत केला आहे. तसेच तिला मानसिक त्रास देण्यात आल्याचे म्हटले आहे़ दोन महिन्यांपूर्वी प्रियंकाला मूतखड्याचा त्रास होत असल्याने तिला दवाखान्यात दाखल केले होते. या वेळी प्रियंकाने हा प्रकार वडिलांना सांगितला. मात्र डॉ. मुखर्जी यांनी मैत्रिणींमध्ये छोटेमोठे वाद होत असतात, सर्व सुरळीत होईल असे प्रियंकाला समजावत गावाकडे गेले होते. हा छळ असह्य झाल्याने तिने २५ मे रोजी रात्री १२.१५ वाजेच्या सुमारास वसतिगृहातील आपल्या खोलीतील पंख्याला ओढणी बांधून गळफास घेत आत्महत्या केली. प्रियंका हिच्या मृत्यूला या तीन मैत्रिणीच जबाबदार असल्याचे फिर्यादीत नमूद केले आहे. (प्रतिनिधी)