शिंदेंचा निवडणूक संन्यास!

निवडणुकीत स्वकीयांनीच दगा दिला. सर्व ते प्रयत्न करूनही माझा पराभव झाला. माझे डिपॉझिट वाचले हे काय कमी नाही. यासाठी आपण कोणाला जबाबदार धरणार नाही

सोलापूर : निवडणुकीत स्वकीयांनीच दगा दिला. सर्व ते प्रयत्न करूनही माझा पराभव झाला. माझे डिपॉझिट वाचले हे काय कमी नाही. यासाठी आपण कोणाला जबाबदार धरणार नाही, मात्र निवडणुकीच्या राजकारणातून आपण निवृत्ती घेत असल्याची घोषणा माजी केंद्रीय गृहमंत्री सुशीलकुमार शिंदे यांनी मंगळवारी केली. लोकसभा निवडणुकीतील पराभवानंतर शिंदे प्रथमच सोलापुरात आले होते. सोमवारी कार्यकर्त्यांच्या गाठीभेटी आणि निवडणुकीतील पराभवाची कारणमीमांसा जाणून घेतल्यानंतर त्यांनी मंगळवारी पत्रकार परिषदेत आपली भूमिका विशद केली. आपल्याकडेच गृहखाते (पान १ वरुन) असल्याने पराभव होणार याची कल्पना होती. यामुळेच आपण सोलापुरात १२ दिवस तळ ठोकून होतो़ निवडणूक निकालानंतर ती शंका खरी ठरली. स्वकियांनी दगा दिला. प्रचारात छोटे-छोटे मेळावे घेतले, यात सर्वांचे सहकार्य लाभले, त्यामुळेच ३ लाख ६७ हजार मते मिळाली. माझे डिपॉजिट वाचले याचे मला समाधान आहे. फक्त वाढलेली मते मी मिळवू शकलो नाही, अशी प्रांजळ कबुलीही त्यांनी दिली. निवडणुकीला उभे राहण्याची माझी इच्छा नव्हती, वारंवार तसे जाहीरपणे सांगितले होते. पक्षश्रेष्ठीने आदेश दिल्यानेच निवडणूक लढवावी लागली. भाजपाचे नूतन खासदार शरद बनसोडे यांनी मदत मागितल्यास आपण सहकार्य करण्यास तयार आहे. जिल्ह्णातील कोणताही प्रकल्प रखडणार नाही, त्यासाठी आपण स्वत: आग्रही राहू, अशी ग्वाही त्यांनी दिली़ (प्रतिनिधी)