भाजपामध्ये जाणार का? एकनाथ खडसे म्हणाले, “मी आजही RSSचा स्वयंसेवक आहे, गिरीश महाजन...”

NCP SP Group Eknath Khadse News: ४० ते ४५ वर्ष भारतीय जनता पक्ष वाढवण्यात मी जिवाचे रान केले. मी भाजपामध्ये असताना गिरीश महाजन माझा सामान्य कार्यकर्ता होता. आता भाजपात ९० टक्के लोक बाहेरचे आहेत, असे एकनाथ खडसे यांनी म्हटले आहे.

NCP SP Group Eknath Khadse News: मी माझे संस्कार विसरलेलो नाही. मी राष्ट्रीय स्वयंसेवक संघाचा स्वयंसेवक आहे. ही गोष्ट मी अभिमानाने अनेकदा सांगितली आहे. मी त्या शिस्तीत राहिलेलो आहे. ४० ते ४५ वर्ष भारतीय जनता पक्ष वाढवण्यात मी जिवाचे रान केलेले आहे. त्यामुळे एकाच दिवसांत सारे संस्कार विसरता येतात असे नाही. परंतु, शरद पवार यांनी मला अंधाराच्या कालखंडात उजेडात आणण्याचा प्रयत्न केलेला आहे. त्यामुळे शरद पवार यांचे ऋण मी विसरू शकत नाही, असे ज्येष्ठ नेते एकनाथ खडसे यांनी म्हटले आहे. 

पत्रकारांशी बोलताना एकनाथ खडसे यांना भाजपा प्रवेशाबाबत प्रश्न विचारण्यात आला होता. यावर बोलताना, मी अनेकवेळा सांगितले आहे की, भारतीय जनता पक्षात जाण्याचा प्रश्नच नाही. त्या गोष्टीला आता मी पूर्णविराम दिलेला आहे आणि मी राष्ट्रवादी काँग्रेस शरद पवार गटासोबत राहणार आहे, असे मी अनेकवेळा मांडले आहे. परंतु, वारंवार चर्चा होतात आणि मग मनोरंजन होते, करमणूक होते, अशी खोचक प्रतिक्रिया एकनाथ खडसे यांनी दिली. या सगळ्याला गिरीश महाजन कारणीभूत आहेत का, असा सवाल एकनाथ खडसे यांना करण्यात आला.

गिरीश महाजन माझा सामान्य कार्यकर्ता होता

यावर बोलताना, मी भाजपामध्ये असताना गिरीश महाजन माझा सामान्य कार्यकर्ता होता. मी मंत्री असताना त्याला मंत्रिमंडळात स्थान नव्हते. मी गेल्यावर तो कार्यकर्त्याचा मंत्री झाला, असे एकनाथ खडसे यांनी सांगितले. तसेच भाजपाच्या विरोधात दोन ठाकरेंनी एकत्र आलेच पाहिजे. सत्ताधाऱ्यांना विरोध करणाऱ्या सर्वांनी एकत्र आल्यास आगामी निवडणुकात चांगले यश मिळेल, असा विश्वास एकनाथ खडसे यांनी व्यक्त केला.

दरम्यान, भाजपा हा पूर्वी भ्रष्टाचारमुक्त आणि गुन्हेगारीमुक्त अशा विचारधारेने चालणार पक्ष होता. मात्र, आता पूर्वीचा भाजपा राहिला नाही. ज्या लोकांवर भाजपनेही आरोप केले असे ९० टक्के बाहेरचे लोक भाजपमध्ये आहेत. पूर्वी भाजपाची विचारधार वेगळी होती, असे खडसे यांनी म्हटले आहे. भाजपाच्या या अवस्थेला राज्याचे नेतृत्व जबाबदार आहे का, अशी विचारणा खडसे यांना करण्यात आली होती. यावर, या प्रक्रियेत असणारे सर्व आणि पक्षात प्रवेश देणारे संघटनेचे नेते यास जबाबदार आहे, असे खडसे यांनी सांगितले.