ठाकरे बंधूंबाबत अपशब्द; मनसे आणि उद्धवसेनेच्या कार्यकर्त्यांकडून मराठी तरुणाला मारहाण

Nalasopara Crime News: ठाकरे बंधूंबाबत समाज माध्यमावर अपशब्द काढणाऱ्या एका मराठी तरुणाला मनसे आणि उद्धवसेनेच्या कार्यकर्त्यांनी बेदम चोप देत धिंड काढली. नालासोपारा येथे गुरुवारी रात्री हा प्रकार घडला. 

नालासोपारा - ठाकरे बंधूंबाबत समाज माध्यमावर अपशब्द काढणाऱ्या एका मराठी तरुणाला मनसे आणि उद्धवसेनेच्या कार्यकर्त्यांनी बेदम चोप देत धिंड काढली. नालासोपारा येथे गुरुवारी रात्री हा प्रकार घडला.

आचोळे परिसरात राहणारा सुरज राजेशिर्के काही दिवसांपासून मनसे अध्यक्ष राज ठाकरे आणि उद्धवसेनेचे पक्षप्रमुख उद्धव ठाकरे यांच्याबाबत रिल्स बनवत होता. त्यात त्याने ठाकरे बंधूंबाबत अपशब्द वापरले होते. हा सुरज कुठे राहतो ते समजत नव्हते. कार्यकर्ते त्याचा शोध घेत होते. दरम्यान, गुरुवारी त्याचा ठावठिकाणा समजला. दोन्ही पक्षांचे कार्यकर्ते रात्री त्याच्या घरी गेले आणि घरातून त्याला मारहाण करत बाहेर काढले. त्याची अर्धनग्न धिंड काढत तुळींज पोलिसांच्या ताब्यात दिले. आपल्या कृत्याबाबत या तरुणाने माफी मागितली. त्याला मारहाण करताना आणि माफी मागतानाची चित्रफीत समाजमाध्यमावर व्हायरल केली आहे.

संबंधितास आम्ही तुळींज पोलिस ठाण्यात दिल्याचे उद्धवसेनेचे युवानेते रोहन चव्हाण यांनी सांगितले. तो दुर्दैवाने मराठीच आहे. उद्धवसेना, मनसेचा पराभव अशाच मराठी माणसांमुळे होतो म्हणून त्याचा पाहुणचार केला, असे मनसेचे किरण नकाशे यांनी सांगितले. मनसे व उद्धवसेनेच्या कार्यकर्त्यांनी घरात घुसून मला व  वडिलांना मारहाण केली आणि माझ्या भावाला मारत घेऊन गेले. आमच्या घराची त्यांनी तोडफोड केली, असे साधना राजेशिर्के हिने सांगितले.