भारतीय निवडणूक आयोगाने आज (रविवार, १५ मार्च २०२६) देशातील पाच राज्यांच्या विधानसभा निवडणुकांसोबतच महाराष्ट्रातील बारामती आणि राहुरी या दोन विधानसभा मतदारसंघांसाठी पोटनिवडणूक जाहीर केली. या घोषणेनंतर अजित पवार यांचे पुतणे आणि आमदार रोहित पवार भावूक झाल्याचे पाहायला मिळाले. ज्या बारामतीत केवळ मताधिक्याची चर्चा व्हायची, तिथे आज पोटनिवडणूक घ्यावी लागत आहे. अजितदादा असते तर, कदाचित ही वेळ आलीच नसते, अशा शब्दांत त्यांनी आपल्या भावना व्यक्त केल्या आहेत.
बारामती हा मतदारसंघ दशकानुदशके पवार कुटुंबाचा बालेकिल्ला राहिला आहे आणि अजित पवार यांनी इथून अनेकदा विक्रमी मताधिक्याने विजय मिळवला होता. रोहित पवार यांनी आपल्या पोस्टमध्ये बारामतीच्या राजकीय इतिहासाचा संदर्भ देत अजितदादांच्या जाण्याने निर्माण झालेली पोकळी शब्दांत मांडली आहे. त्यांनी लिहिले की, "ज्या निवडणुकीत फक्त मताधिक्याचीच चर्चा व्हायची त्या बारामती मतदारसंघात कधी पोटनिवडणूक घ्यावी लागेल, असं कुणाला स्वप्नातही कधी वाटलं नाही.. पण दुर्दैवाने अजितदादा आपल्यातून गेले आणि आज बारामती विधानसभा मतदारसंघासाठी पोटनिवडणूक जाहीर झाली...कधी कधी वास्तव हे कल्पनेपेक्षाही अधिक भयंकर असतं..!"
रोहित पवार यांनी गुरुवारी दिल्लीत काँग्रेस नेते राहुल गांधी यांची भेट घेतली. या भेटीनंतर प्रसारमाध्यमांशी बोलताना रोहित पवार यांनी दिवंगत नेते अजित पवार यांच्या विमान अपघाताबाबत अत्यंत गंभीर प्रश्न उपस्थित केले. "अजितदादांच्या अपघाताशी संबंधित अनेक महत्त्वाचे तपशील अद्याप लपवले जात असून, लवकरच मी पुराव्यांसह मोठा खुलासा करणार आहे," असाही इशारा त्यांनी दिला आहे.
रोहित पवार यांच्या मते, अपघाताशी संबंधित अनेक तांत्रिक बाबी अद्याप सार्वजनिक करण्यात आलेल्या नाहीत. जनतेला या अपघाताचे संपूर्ण सत्य जाणून घेण्याचा पूर्ण अधिकार आहे. "माझ्याकडे असलेली कागदपत्रे आणि तथ्यांच्या आधारे मी लवकरच सर्व सत्य जनतेसमोर मांडणार आहे," असे सांगत त्यांनी या प्रकरणात मोठा गौप्यस्फोट करण्याचे संकेत दिले. लोकशाहीमध्ये पारदर्शकता ही सर्वात महत्त्वाची असते. कोणावरही वैयक्तिक टीका करणे हा माझा उद्देश नसून, केवळ सत्य समोर आणणे हेच माझे उद्दिष्ट आहे, असेही त्यांनी स्पष्ट केले.
रोहित पवार यांच्या या इशाऱ्यामुळे महाराष्ट्राच्या राजकारणात पुन्हा एकदा चर्चांना उधाण आले आहे. काही विरोधी नेत्यांनी रोहित पवारांना आव्हान दिले आहे की, जर त्यांच्याकडे खरोखरच काही ठोस माहिती असेल, तर त्यांनी ती वेळ न घालवता तातडीने सार्वजनिक करावी. विमानाला असलेले अतिरिक्त इंधन टँक आणि ब्लॅक बॉक्सशी छेडछाड करण्याचा झालेला कथित प्रयत्न, यावर रोहित पवार यांनी यापूर्वीच संशय व्यक्त केला आहे.
Web Summary : Baramati faces a by-election after Ajit Pawar's death, a shock for the constituency. Rohit Pawar hints at revealing truths about Ajit Pawar's plane crash, alleging hidden details and demanding transparency. He promises to disclose evidence soon.
Web Summary : अजित पवार के निधन के बाद बारामती में उपचुनाव, निर्वाचन क्षेत्र के लिए एक सदमा। रोहित पवार ने अजित पवार के विमान दुर्घटना के बारे में सच्चाई उजागर करने का संकेत दिया, छिपे हुए विवरणों का आरोप लगाया और पारदर्शिता की मांग की। उन्होंने जल्द ही सबूत का खुलासा करने का वादा किया।