मुंबई : कोरोनामुळे उद्भवलेल्या संसर्गजन्य परिस्थितीचा विचार करता यंदाचा गणेशोत्सव साध्या पद्धतीने साजरा करण्याचा निर्णय सर्व मंडळे आणि राज्य सरकारने घेतला आहे. यामुळे यंदाचा गणेशोत्सव कसा साजरा करावा यासाठी सरकारकडून मार्गदर्शक सूचना जारी करण्य़ात आल्या आहेत. (Ganeshotsav 2020 celebration)सार्वजनिक गणेशोत्सवासाठी गणेशोत्सव मंडळांनी महापालिका/स्थानिक प्रशासन यांची त्यांचे धोरणानुसार न्यायोचित पूर्वपरवनागी घेणे आवश्यक राहणार आहे. कोविड-१९ मुळे उद्भवलेल्या संसर्गजन्य परिस्थितीचा विचार करता तसेच मा. न्यायालयाने निर्गमित केलेले आदेश आणि महापालिका तसेच संबंधित स्थानिक प्रशासनाचे मंडपांबाबतचे धोरण याच्याशी सुसंगत असे मर्यादित स्वरुपाचे मंडप उभारण्यात यावेत. या वर्षीचा गणेशोत्सव साध्या पध्दतीने साजरा करणे अपेक्षित असल्याने घरातील तसेच सार्वजनिक गणपतीची सजावट करताना त्यात भपकेबाजी नसावी, अशी सूचना करण्यात आली आहे. याचसोबत श्रीगणेशाची मूर्ती सार्वजनिक मंडळांकरिता ४ फूट व घरगुती गणपती २ फूटांच्या मर्यादेत असावी. या वर्षी शक्यतो पारपारिक गणेशमूर्ती ऐवजी घरातील धातू/संगमरवर आदी मुर्तीचे पूजन करावे. शाडू किवा पर्यावरणपुरक मूर्ती असल्यास त्याचे विसर्जन शक्यतो घरच्या घरी करावे, ते शक्य नसल्यास नजिकच्या कृत्रीम तलावात विसर्जन करावे. गणेशमूर्तीचे विसर्जन पुढे ढकलणे शक्य असल्यास या मूर्तीचे विसर्जन माघी गणेशोत्सव विसर्जनावेळी किंवा २०२१ च्या भाद्रपद महिन्यातील विसर्जनाच्या वेळी करता येणे शक्य आहे. जेणेकरुन आगमन विसर्जनासाठी गर्दीत जाणे टाळून स्वत: व कुटुंबियांचे कोरोना साथीच्या रोगापासून रक्षण होईल ,असे यामध्ये म्हटले आहे.
उत्सवाकरिता वर्गणी/देणगी स्वेच्छेने दिल्यास त्याचा स्वीकार करावा. जाहिरातीच्या प्रदर्शनामुळे गर्दी आकर्षित होणार नाही असे पहावे. तसेच आरोग्य विषयक व सामाजिक संदेश असलेल्या जाहिराती प्रदर्शित करण्यास प्राधान्य देण्यात यावे. सांस्कृतिक कार्यक्रमाऐवजी आरोग्य विषयक उपक्रम, शिबीरे उदा. रक्तदान, आयोजित करण्यास प्राधान्य द्यावे. तसेच कोरोना, मलेरिया, डेंग्यू इ. आजार आणि त्यांचे प्रतिबंधात्मक उपाय याबाबत जनजागृती करण्यात यावी, असे या पत्रकात म्हटले आहे. आरती, भजन, किर्तन व अन्य धार्मिक कार्यक्रम आयोजित करताना गर्दी होणार नाही. तसेच ध्वनी प्रदुषणासंदर्भातील नियमांचे व तरतुदींचे पालन करण्यात यावे, अशीही सूचना करण्यात आली आहे.
अन्य महत्वाच्या बातम्या...
राजस्थानमध्ये घोडेबाजार, संकटात गेहलोत सरकार?; भाजपाच्या दोन नेत्यांना अटक
चीननेच कोरोनाची माहिती लपविली, WHO ही साथीला! आरोप करणाऱ्या महिला सायंटिस्टचे पलायन
परीक्षा नाही, केवळ एक मुलाखत अन् सरकारी नोकरी; 43000 रुपये पगार