“सुधाकर बडगुजर यांच्या प्रवेशाने भाजपाची ताकद वाढली, आता महापालिका निवडणूक...”: गिरीश महाजन

BJP Girish Mahajan News: आम्हालाही पक्ष वाढवायचा आहे. आमचे उद्दिष्ट ठरलेले आहे, असे गिरीश महाजन यांनी म्हटले आहे.

BJP Girish Mahajan News: मागील काही दिवसांपासून नाशिकमधील उद्धवसेनेचे निलंबित वादग्रस्त नेते सुधाकर बडगुजर हे भाजपामध्ये प्रवेश करणार असल्याच्या चर्चा सुरू होत्या. या चर्चांना अखेर पूर्णविराम मिळाला. सुधाकर बडगुजर यांचा मुंबई भाजपा कार्यालयात मोठ्या उत्साहात पक्ष प्रवेश झाला. यानंतर राजकीय वर्तुळातून प्रतिक्रिया उमटत असून, काँग्रेस आणि ठाकरे गटाने या पक्ष प्रवेशावरून भाजपावर जोरदार टीका केली आहे. तर दुसरीकडे, सुधाकर बडगुजर यांच्या प्रवेशामुळे भाजपाची ताकद वाढली आहे, असे मंत्री गिरीश महाजन यांनी म्हटले आहे. 

पत्रकारांशी बोलताना गिरीश महाजन म्हणाले की, आम्हालाही पक्ष वाढवायचा आहे. आम्हाला पुन्हा महापालिका ताकदीने लढायची आहे. आमचे उद्दिष्ट ठरलेले आहे. ज्यांना पक्षात घेतले, ते अनेकदा निवडून आलेले आहेत. काही वाद-विवाद असतील ते मिटवले जातील. आमच्या पक्षामध्ये मंत्री असलेले अनेक जण मागच्या काळात टीका करत होते. पण आता ते सगळे एकरूप झालेले आहेत. सुधाकर बडगुजर यांचा पक्षप्रवेश झाला तो भारतीय जनता पक्षासाठी फायदेशीर आहे. यामुळे भारतीय जनता पक्षाची ताकद वाढलेली आहे, असे गिरीश महाजन यांनी सांगितले. 

आमच्यात कुठेही मनभेद, मतभेद नाही

सुधाकर बडगुजर यांचा भाजपा प्रवेश होणार आहे का, याबाबत माहिती असे भाजपा मंत्री चंद्रशेखर बावनकुळे यांनी म्हटले होते. परंतु, सुधाकर बडगुजर यांच्या प्रत्यक्ष भाजपा प्रवेशावेळी स्वतः चंद्रशेखर बावनकुळे हजर झाले. यावरून राजकीय वर्तुळात चर्चांना उधाण आले. यावर गिरीश महाजन यांनी स्पष्ट शब्दांत भाष्य केले. थोडे मिस कम्युनिकेशन झाल्याने अशी गोष्ट घडली. हा घरचा कार्यक्रम होता. तारखेत संभ्रम होता. अचानक निर्णय झाला आणि हा पक्षप्रवेश झालेला आहे. त्यामुळे आमच्यात कुठेही मनभेद किंवा मतभेद नाही, असे गिरीश महाजन यांनी म्हटले आहे. 

दरम्यान, भाजपात प्रवेश झाला आहे. पक्ष जी जबाबदारी देईल ती पार पाडू. मला वर्तमान काळात काम करायचे आहे आणि भविष्य घडवायचे आहे, अशी प्रतिक्रिया सुधाकर बडगुजर यांनी दिली.