अजित पवार अचानक सिल्व्हर ओकवर; बंडानंतर प्रथमच शरद पवारांच्या घरी, कारण काय? 

राष्ट्रवादीतील बंडानंतर अजित पवार हे शरद पवारांच्या घरी आल्याने चर्चांना उधाण आले आहे. यामागचे कारणही समोर आले आहे. 

उपमुख्यमंत्री अजित पवार हे शपथ घेतल्यानंतर पहिल्यांदाच सिल्व्हर ओकवर आले आहेत. राष्ट्रवादीतील बंडानंतर अजित पवार हे शरद पवारांच्या घरी आल्याने चर्चांना उधाण आले आहे. यामागचे कारणही समोर आले आहे. 

शरद पवार यांच्या पत्नी प्रतिभा पवार यांना दुपारी हॉस्पिटलमध्ये दाखल करण्यात आले होते. यानंतर काही वेळातच शरद पवारही तिथे पोहोचले होते. प्रतिभा पवार यांच्या प्रकृतीबाबत राष्ट्रवादीच्या नेत्यांनी माहिती दिली आहे. प्रतिभा पवार यांच्या हाताशी संबंधीत समस्येवर शस्त्रक्रिया केली जाणार होती. यामुळे त्यांना ब्रीच कँडी हॉस्पिटलमध्ये अॅडमिट करण्यात आल्याचे पक्षाच्या नेत्याने सांगितले होते.

काकी प्रतिभा पवार यांची प्रकृती जाणून घेण्यासाठी अजित पवार सिल्हर ओकवर आल्याचे सांगितले जात आहे. प्रतिभा पवार यांच्यावर शस्त्रक्रिया करण्यात आली आहे. परंतू, त्या हॉस्पिटलमध्ये आहेत की सिल्हर ओकवर त्यांना आणण्यात आले आहे, हे अद्याप समजू शकलेले नाहीय. 

यावर मुख्यमंत्री एकनाथ शिंदे यांनी कोल्हापुरातून प्रतिक्रिया दिली आहे. त्यांची काकी आजारी आहे, त्यामुळे ते तिकडे गेले आहेत. यात वेगळा अर्थ घेण्यासारखे काही नाही, असे शिंदे म्हणाले.