“कमर्शिअलनंतर घरगुती गॅसचा नंबर लागेल, आता चूल पेटवावी लागते का?”; विरोधकांची सरकारवर टीका

Congress Criticizes Govt Over Gas Cylinder: या युद्धामुळे गॅसचा तुटवडा देशात आणि राज्यात पाहायला मिळत आहे.

Congress Criticizes Govt Over Gas Cylinder: इराणमध्ये नवीन सर्वोच्च नेत्याची निवड आणि सुरू असलेल्या युद्धामुळे कच्च्या तेलाच्या किमतींनी गेल्या अनेक वर्षातील उच्चांक गाठला. युद्धामुळे कच्च्या तेलाच्या किमतीत रातोरात ३० टक्क्यांची प्रचंड वाढ झाली. आंतरराष्ट्रीय बाजारात 'ब्रेंट क्रूड'ने प्रतिबॅरल १२० डॉलर्सचा टप्पा गाठल्याने संपूर्ण जगाचे धाबे दणाणले असून, जगभरातील शेअर बाजार कोसळले आहेत. या युद्धामुळे आखाती देशांतील तेल उत्पादन आणि वाहतूक धोक्यात आली असून, त्याचे थेट पडसाद भारतीय अर्थव्यवस्थेवरही पडून महागाई वाढण्याची भीती आहे. यातच राज्यातील काँग्रेस नेत्यांनी यावरून टीका केली आहे. 

हॉटेलमध्ये जेवणारे, कामगार गॅसवरती अवलंबून आहे. व्यवसाय करणाऱ्यांना मोठे नुकसान आहे. हजारो लोक काम करतात, उद्योग व्यवसाय असो किंवा घरात काय परिस्थिती होईल सांगता येत नाही. महागाईचा परिणाम १०० टक्के लोकांना जाणवणार आहे. पुढील ८-१० दिवसात मध्यमवर्गीयांना सहन करावे लागेल. सरकार सगळे व्यवस्थित चांगले आहे, असे दाखवण्याचा प्रयत्न करत आहे, अशी टीका काँग्रेस नेते सतेज पाटील यांनी केली. 

कमर्शिअलनंतर घरगुती गॅसचा नंबर लागण्याची शक्यता

कमर्शिअल गॅसवर निर्बंध आणलेत. घरगुती गॅसचा नंबर लागण्याची शक्यता आहे. चूल पेटवावी लागते का? असा प्रश्न आहे. ऑइल कंपन्यांकडे कच्चा माल नाही तर उत्पादन कसे वाढवणार, एकूणच परराष्ट्र धोरण चुकीच्या पद्धतीचे परिणाम आहेत. ग्राऊंड परिस्थिती सगळ्यांना माहिती आहे काय आहे. सभागृहात सरकारने आश्वासित करावे, गॅसचा तुटवडा होणार आहे, सभागृहात आम्ही हा प्रश्न मांडणार आहोत. सरकार माहिती घेत आहे, पुरवठा किती आहे काय आहे? जर तुडवडा नसेल तर अधिकाऱ्यांकडून माहिती का घेतली जात आहे, असेही त्यांनी म्हटले आहे. 

दरम्यान, गॅसच्या तुटवड्यामुळे मुंबईतील २० टक्के हॉटेल बंद ठेवण्याचा निर्णय घेण्यात आला आहे. तसेच पुढील तीन दिवस असाच गॅसचा तुटवडा सुरू राहिल्यास मुंबईतील ५० टक्के हॉटेल्स बंद होण्याची शक्यता आहे. अमेरिका इस्रायल आणि इराणमध्ये सुरू असलेल्या युद्धामुळे गॅसचा तुटवडा देशात आणि राज्यात पाहायला मिळत आहे.