‘...तर अमित शहा यांनाही न्यायालयात खेचणार’

एकनाथ खडसे आणि भाजपाची बदनामी केल्याप्रकरणात प्रतिवादी स्थानिक असून हा दावा दाखल करण्यास पक्षाने तसेच अमित शहा यांनी परवानगी दिली होती काय?

मुक्ताईनगर (जि. जळगाव) : एकनाथ खडसे आणि भाजपाची बदनामी केल्याप्रकरणात प्रतिवादी स्थानिक असून हा दावा दाखल करण्यास पक्षाने तसेच अमित शहा यांनी परवानगी दिली होती काय? जर तसे नसेल तर भाजपाचे राष्ट्रीय अध्यक्ष अमित शहा यांनाही आपण न्यायालयात खेचणार असल्याचा इशारा सामाजिक कार्यकर्त्या अंजली दमानिया यांनी दिला आहे. बदनामी प्रकरणात मिळालेल्या समन्सवरून त्या मंगळवारी मुक्ताईनगर न्यायालयात हजर झाल्या होत्या.मी वक्तव्यावर ठाम आहोत. खटला लढणार आहोत. प्रतिवादी हे तिसरे पक्षकार आहेत. स्वत: एकनाथ खडसे यांनी दावा दाखल केला असता तर मला सिद्ध करणे भाग होते, असे असले तरी मी तो गुन्हा सिद्ध करण्यास तयार आहे. सध्या तरी वकिलाची मला आवश्यकता वाटत नाही. न्यायालयीन कामकाजात वरील वक्तव्यानुसार आपण दुपारी अर्ज सादर करणार असल्याचे सांगत या प्रकरणात वादी हे या घटनेत थेट बाधीत नसून या आधारावर हा खटला चालूच शकत नाही. परिणामी दावा फेटाळण्याची आपण न्यायालयास विनंती करणार आहे. आपण जामीन घेणार नसून पी.आर.बॉण्डवर जामीन देण्यात यावा, असा युक्तीवाद दमानिया यांनी केल्यानंतर त्यांना जामीन देण्यात आला. (प्रतिनिधी)