Ajit Pawar gets clean chit in irrigation scam; ACB submits affidavit to High Court | सिंचन घोटाळ्यात अजित पवारांना ‘क्लीन चिट’; एसीबीने हायकोर्टात सादर केले प्रतिज्ञापत्र
सिंचन घोटाळ्यात अजित पवारांना ‘क्लीन चिट’; एसीबीने हायकोर्टात सादर केले प्रतिज्ञापत्र

नागपूर : लाचलुचपत प्रतिबंधक विभागाने आधीच्या भूमिकेच्या अगदी विरोधात जात माजी उपमुख्यमंत्री अजित पवार यांना सिंचन घोटाळ्यात ‘क्लीन चिट’ दिली आहे. टेंडर प्रक्रिया, खर्च मंजुरी इत्यादीसंदर्भातील बाबी तपासण्याची जबाबदारी जल संसाधन विभाग सचिव व विदर्भ पाटबंधारे विकास महामंडळाचे कार्यकारी संचालक यांची आहे. त्या दोघांनी पवार यांना विशिष्ट बाब करता येणार नाही, याची माहिती दिल्याचे पुरावे रेकॉर्डवर नाहीत. त्यामुळे पवार यांना या प्रकल्पांतील कुठल्याही गैरव्यवहारासाठी जबाबदार धरता येणार नाही, असे प्रतिज्ञापत्र लाचलुचपत प्रतिबंधक विभागाने मुंबई हायकोर्टाच्या नागपूर खंडपीठात दाखल केले आहे.

लाचलुचपत प्रतिबंधक विभागाच्या पोलीस अधीक्षक (नागपूर) रश्मी नांदेडकर यांच्यामार्फत हे प्रतिज्ञापत्र दाखल केले आहे. यापूर्वी २६ नोव्हेंबर २०१८ रोजी हायकोर्टात प्रतिज्ञापत्र देत पवार हे सिंचन घोटाळ्यासाठी जबाबदार असल्याचे सांगितले होते. महाराष्ट्र गव्हर्नमेंट रुल्स ऑफ बिझनेस अ‍ॅन्ड इन्स्ट्रक्शनमधील नियम १० अनुसार संबंधित मंत्री त्यांच्या विभागातील सर्व बाबींसाठी जबाबदार असतात. पवार हे जल संसाधन मंत्री असताना विदर्भ व कोकण पाटबंधारे विकास महामंडळांतर्गत विविध सिंचन प्रकल्पांमध्ये अनियमितता झाल्याचे चौकशीत आढळले आहे. मोबिलायझेशन अ‍ॅडव्हान्स व अन्य काही वादग्रस्त मंजुरीच्या नोटशीटस्वर पवार यांनी स्वाक्षऱ्या केल्या आहेत, अशी माहिती त्यावेळेच्या प्रतिज्ञापत्रात दिली होती.



जबाबदारी अधिकाऱ्यांचीच
महाराष्ट्र गव्हर्नमेंट रुल्स ऑफ बिझनेस अ‍ॅन्ड इन्स्ट्रक्शनमधील नियम १४ अनुसार विभागाच्या सचिवाने टेंडरसंबंधित बाबी तपासून माहिती संबंधित मंत्री व मुख्य सचिवांना दिली पाहिजे. जल संसाधन विभागाचे सचिव व विदर्भ पाटबंधारे विकास महामंडळाचे कार्यकारी संचालक यांचा दर्जा, कर्तव्ये व जबाबदाऱ्या समान आहेत.

त्यामुळे सिंचन प्रकल्पांचे टेंडर व खर्च मंजुरीमध्ये काही अवैधता आहे वा नाही, हे तपासण्याची जबाबदारी या दोन अधिकाºयांची होती. त्यांनी याची माहिती पवार यांना द्यायला हवी होती. त्यांनी तसे केले नाही. त्यामुळे पवार यांच्यावर घोटाळ्याची जबाबदारी निश्चित करता येणार नाही, असे आताच्या प्रतिज्ञापत्रात नमूद केले आहे.
 

English summary :
The Anti-Corruption Department has given a 'clean chit' to the former Deputy Chief Minister Ajit Pawar in the irrigation scam. The affidavit has been filed through Rashmi Nandedkar. For more latest news in Marathi follow Lokmat.com. Stay updated.


Web Title: Ajit Pawar gets clean chit in irrigation scam; ACB submits affidavit to High Court

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.