Latur: मोबाईलवर स्टेट्स ठेवून तरुणाची टेम्पोमध्ये आत्महत्या, लातूर- औसा महामार्गावरील धक्कादायक घटना!

लातूर -औसा महामार्गावर एका ३२ वर्षीय तरुणाने टेम्पोमध्ये गळफास लावून आत्महत्या केल्याची घटना उघडकीस आली आहे.

"मी आत्महत्या करत आहे", असे स्टेटस मोबाईलवर ठेवून एका ३२ वर्षीय तरुणाने स्वतःच्याच टेम्पोला गळफास घेऊन आपली जीवनयात्रा संपवल्याची हृदयद्रावक घटना रविवारी रात्री ११ वाजण्याच्या सुमारास घडली. औसा-लातूर महामार्गावरील लिंबोळी पेंड कारखान्याजवळ ही घटना घडली असून, वयोवृद्ध आई-वडिलांचा एकमेव आधार गेल्याने परिसरात हळहळ व्यक्त होत आहे.

नेमकी घटना काय?

मिळालेल्या माहितीनुसार, नांदेड जिल्ह्यातील मुखेड तालुक्यातील नांदगाव येथील गजानन मारवाडी (वय ३२) हा तरुण आपल्या मालकीच्या आयशर टेम्पोमध्ये (क्र. MH 26 CH 2192) गुळी भरून सोलापूरच्या दिशेने जात होता. नेहमीप्रमाणे तो या मार्गावरून मालवाहतूक करत असे. मात्र, रविवारी रात्री औशाजवळ आल्यावर त्याने आपला टेम्पो रस्त्याच्या कडेला उभा केला. टेम्पोची साईड लाईट चालू ठेवून, पाठीमागच्या बाजूस असलेल्या दोरीने त्याने गळफास घेतला.

४ तास आधीच दिले होते मृत्यूचे संकेत

गजाननने हे टोकाचे पाऊल उचलण्यापूर्वी सुमारे चार तास आधी आपल्या मोबाईलवर "मी आत्महत्या करत आहे" असे स्टेटस ठेवले होते. तोपर्यंत तो सोलापूरच्या दिशेने प्रवास करत होता. वाटेतच त्याने टेम्पो थांबवून आपले आयुष्य संपवले. रात्री ११ च्या सुमारास ही घटना उघडकीस आली.

कुटुंबावर कोसळला दु:खाचा डोंगर

मयत गजानन हा अविवाहित होता आणि त्याच्या कुटुंबाची आर्थिक परिस्थिती अत्यंत हलाखीची आहे. त्याच्या वडिलांनी अत्यंत कष्टाने आपल्या सात मुलींची लग्ने लावून दिली होती. घराचा आणि वृद्ध आई-वडिलांचा एकमेव आधार असलेल्या गजाननला त्यांनी काही महिन्यांपूर्वीच व्यवसायासाठी आयशर टेम्पो घेऊन दिला होता. मात्र, व्यवसायात जम बसवण्यापूर्वीच गजाननने मृत्यूला कवटाळल्याने वृद्ध माता-पित्यांचे छत्र हरपले आहे.

पोलीस कारवाई

घटनेची माहिती मिळताच औसा पोलीस ठाण्याचे फौजदार भाऊसाहेब माळवदकर आणि बीट अंमलदार रामकृष्ण घुटे यांनी घटनास्थळी भेट दिली. पोलिसांनी पंचनामा करून मृतदेह शवविच्छेदनासाठी औसा येथील ग्रामीण रुग्णालयात पाठवला आहे. गजाननने नेमक्या कोणत्या कारणातून आत्महत्या केली, याचे कारण अद्याप स्पष्ट होऊ शकले नाही.