लातूर शहरात ५५ पेक्षा अधिक खाजगी रुग्णालयांमध्ये कोरोना बाधित रुग्णांवर उपचार केले जात आहेत. आजपर्यंत हजारो रुग्ण हे उपचार घेऊन बरे झाले आहेत. खाजगी रुग्णालयात उपचार घेताना अनेकवेळा संबंधित डॉक्टर योग्य पद्धतीने बिल घेत आहे की नाही? अशी शंका असते. त्यामुळे रुग्णालयात अधिक पैसे घेतले जात असल्याची नातेवाईकांची तक्रार असते. अशावेळी डॉक्टरांनी आपल्याला दिलेले बिल तपासून पाहता यावे यासाठी महानगरपालिकेच्या वतीने सर्व खासगी रुग्णालयांच्या परिसरात शासनमान्य दर दर्शविणारे फलक लावण्यात आले आहेत.
शासकीय दरानुसार एखादा रुग्ण जनरल वॉर्डमध्ये विलगीकरणात असेल तर त्यासाठी ४ हजार रुपये दर आहे. व्हेंटिलेटर शिवाय रुग्ण अतिदक्षता विभागात विलगीकरणात असेल तर त्यासाठी ७ हजार ५०० रुपये तर व्हेंटिलेटरसह उपचार सुरू असतील तर त्यासाठी ९ हजार रुपये शासकीय दर निश्चित करण्यात आलेला आहे. एक दिवसाच्या आकारण्यात आलेल्या दरामध्ये रुग्णाची नियमित देखभाल, रक्त व लघवी तपासणी, २ डी इको, एक्स-रे, ईसीजी व ऑक्सिजन चार्ज, मर्यादित किरकोळ औषधे, डॉक्टर तपासणी, बेड चार्जेस, जेवण, नाकातून नळी टाकण्यासारखे छोटे उपचार यांचा समावेश आहे. याशिवाय पीपीई किट, सेंट्रल लाईन टाकणे, केमोपोर्ट टाकणे, श्वसन नलिका व अन्य नलिकात दुर्बिणीद्वारे शस्त्रक्रिया, कुठल्याही अवयवाचा तुकडा तपासणीसाठी पाठवणे, छातीतील व पोटातील पाणी काढणे, सिटीस्कॅन सारख्या तपासण्या यासाठी स्वतंत्र दर आकारण्यात येतो. एक दिवसाच्या शुल्कामध्ये या तपासण्यांच्या शुल्काचा समावेश असत नाही. त्यासाठी स्वतंत्रपणे पैसे द्यावे लागतात. खाजगी रुग्णालयात शासकीय दरापेक्षा अधिक पैसे आकारले जात असतील तर रुग्ण किंवा नातेवाईकांनी मनपाच्या हेल्पलाइनवर तक्रार करावी,असे आवाहनही मनपाच्या वतीने करण्यात आले आहे.