क्रीडा ग्रेस गुणांसाठी आयुक्तांचे निर्देश
लातूर : माध्यमिक शालांत प्रमाणपत्र व उच्च माध्यमिक शालांत प्रमाणपत्र परीक्षेस प्रविष्ट होणाऱ्या खेळाडू विद्यार्थ्यांना सवलतीचे वाढीव गुण देण्याबाबत राज्याच्या क्रीडा आयुक्तांनी राज्यातील सर्व जिल्हा क्रीडाधिकाऱ्यांना मंगळवारी सुचविले आहे. त्यामुळे क्रीडा ग्रेस गुणांच्या कामाला गती मिळणार आहे.
इयत्ता दहावी व बारावीसाठी प्रविष्ट होणाऱ्या खेळाडू विद्यार्थ्यांना सवलतीचे वाढीव गुण देण्याबाबत शासनाने निर्णय घेतला आहे. कोविडच्या प्रादुर्भावामुळे २०२०-२१ या वर्षात दहावीसाठी आठवी व नववीमधील क्रीडा कामगिरी तर बारावीसाठी अकरावीतील कामगिरी ग्राह्य धरण्यात येणार आहे. त्यानुसार कार्यालयास प्राप्त होणारे सर्व प्रस्ताव स्वीकारून विभागीय शिक्षण मंडळाकडे सादर करावेत व पात्र प्रस्तावामधील एकही खेळाडू विद्यार्थी क्रीडा गुणांपासून वंचित राहणार नाही, याची दक्षता घ्यावी, असे क्रीडा आयुक्त ओमप्रकाश बकोरिया यांनी कळविले आहे. त्यानुसार शिक्षण मंडळाचा जुनाच फॉरमॅट वापरून प्रस्ताव सादर करावे. शिक्षण मंडळाकडून शाळांना पत्र पाठविण्याची तसेच शासनाच्या मार्गदर्शक तत्त्वानुसार सवलतीचे क्रीडा गुण मिळतील, यासह सविस्तर माहितीसाठी जिल्हा क्रीडा कार्यालयात संपर्क साधण्याचे आवाहन जिल्हा क्रीडाधिकारी महादेव कसगावडे यांनी केले आहे.