लातूर : जो ऑक्सिजन झाडे मोफत देतात, तोच आता लाखो रुपये देऊन विकत घ्यावा लागत आहे. आगाऊ पैसे देऊनही ऑक्सिजन मिळत नाही. कोरोनाने ऑक्सिजनचे महत्त्व पटवून दिले आहे. त्यामुळे कोरोनातून बरे झालेल्या प्रत्येकाने किमान दहा झाडे लावून त्यांचे संगोपन करावे, असे आवाहन महापौर विक्रांत गोजमगुंडे यांनी केले आहे. कोरोनाबाधितांची संख्या वाढत आहे. आरोग्य विभागाकडून प्रत्येकावर उपचार केले जातात. काही रुग्णांना ऑक्सिजनची गरज भासत आहे. अशावेळी प्रत्येक श्वासासाठी लागणाऱ्या ऑक्सिजनची किंमत मोजावी लागत आहे. रुग्णांचे नातेवाईक धावपळ करून ऑक्सिजन बेड मिळवण्यासाठी पाठपुरावाही करत आहेत. त्यामुळे पुढील परिस्थितीचा विचार करून प्रत्येकाने मोफत ऑक्सिजन देणारी दहा झाडे लावावीत आणि त्यांचे संगोपन करावे, असे आवाहन महापौर गोजमगुंडे यांनी केले आहे.
वृक्ष लागवडीचे महत्त्व पटवून देणार...
वृक्ष लागवड मोहिमेमध्ये रुग्णालयांनी सहभाग नोंदविणे गरजेचे आहे. रुग्णालयातून सुट्टी देताना डॉक्टरांनी रुग्णांना ऑक्सिजनचे महत्त्व पटवून द्यावे तसेच दहा झाडे लावून त्यांचे संगोपन करावे, असे आवाहन करावे. तसेच वृक्ष लागवडीचे महत्त्व पटवून देणारे माहितीपत्रक रुग्णाला द्यावे, असे आवाहनही महापौर गोजमगुंडे यांनी केले आहे.