Kolhapur: पिलरच्या उड्डाणपुलास ९८० कोटी रुपये लागणार, महापुरातही महामार्ग सुरु राहणार

सन २०१९ आणि २०२१ साली दोनदा महामार्गावर पाणी येऊन महामार्ग वाहतुकीसाठी बंद झाला होता.

सतीश पाटील

कोल्हापूर : शिरोली सांगली फाटा ते  उचगाव दरम्यान सुमारे साडे तीन किलोमीटर पर्यंतच्या पिलरचा उड्डाणपूल आणि बास्केट ब्रिज करण्याचा (DPR) प्रोजेक्ट रिपोर्ट अहवाल पूर्णत्वास आला असून या उड्डाणपूलासाठी अंदाजे सुमारे ९८० कोटी रुपये निधी लागणार असल्याचे या अहवालात म्हटले आहे. भोपाळ येथील एल एन मलविया कंपनीने तयार केलेला प्रकल्प अहवाल १० जूनपर्यंत केंद्र शासनाला आणि केंद्रीय मंत्री नितीन गडकरी यांना सादर केला जाणार आहे. मुदतीत निधी मंजूर झाला आणि हे काम झाल्यास महापुरातही हा महामार्ग कायमस्वरुपी सुरु राहू शकतो.

शिरोली सांगली फाटा पासून पंचगंगा नदी आणि तावडे हॉटेल पासून उचगाव रेल्वे पूल दरम्यान सन २०१९ आणि २०२१ साली दोनदा महामार्गावर पाणी येऊन महामार्ग वाहतुकीसाठी बंद झाला होता. 

कागल सातारा सहापदरीकरणाचे काम गेल्या दोन वर्षांपासून सुरू आहे. हे काम सुरू असताना सुरुवातीला शिरोली सांगली फाटा ते उचगाव रेल्वे पूल दरम्यान महामार्गावर १० फूटांचा भराव टाकून रस्त्याची उंची वाढवली जाणार होती. आणि पंचगंगा नदीचे व महापुराचे पाणी जाण्यासाठी छोटे गाळे तयार केले जाणार होते. 

पंचगंगा नदीवर बंधारा तयार होऊन पाण्याची फुगी वाढून नदी किनाऱ्यावरील गावांना पुराचा धोका निर्माण होणार होता.  तसेच शेतीचे नुकसान मोठ्या प्रमाणात होणार होते. म्हणून शिरोली सांगली फाटा ते उचगाव रेल्वे पूल दरम्यान महामार्गावर पिलरचा उड्डाणपूल उभा करावा अन्यथा काम बंद पाडू  असा इशारा देत पूरग्रस्त समितीने पंचगंगा नदी पुलाजवळ एकदिवसीय ठिय्या आंदोलन केले होते.‌ 

यानंतर जिल्ह्यातील मंत्री आणि आमदार, खासदार यांनी केंद्रीय मंत्री नितीन गडकरी यांना निवेदन देऊन, भेट घेऊन याठिकाणी पिलरवरचा उड्डाणपूल करावा अशी मागणी उचलून धरली. यावर गडकरी यांनी कोल्हापूरच्या जनतेची मागणी असेल तर याठिकाणी पिलरवरचा उड्डाणपूल करु यासाठी नवीन प्रस्ताव द्या असे सांगितले होते.

असा असेल पिलरचा उड्डाणपूल 

• उड्डाणपूलाची लांबी ३५५० मिटर..
• प्रत्यक्षात पिलरचा उड्डाणपूल २४७५ मिटर 
• उचगाव रेल्वे पूलानंतर रस्ता १०४५ मिटर 
• शिरोली सांगली फाटा नंतर ३० मिटर 
• रस्त्याची रुंदी ३० मिटर 
• सेवामार्ग लांबी ५८२६ मीटर 

सांगलीहून शिरोली सांगली फाटा येथून महामार्गावर जाण्यासाठी २७० मिटरचा रॅम्प रस्ता 
१२० मिटरचा मर्जिंग रस्ता, ८.५ मिटर रस्त्याची रुंदी.
गांधीनगरहून महामार्गावर जाण्यासाठी १७१ मिटरचा रॅम्प रस्ता, ८.५ मिटर रस्त्याची रुंदी.
कोल्हापूरला जाण्यासाठी १३४५ मिटर चा रस्ता
८.५ मिटर रस्त्याची रुंदी.
कोल्हापूरहून महामार्गावर येण्यासाठी ५९० मिटर चा रस्ता, ८.५ मिटर रस्त्याची रुंदी.

२०२३ सालीच ग्रीन सिग्नल

केंद्रीय मंत्री नितीन गडकरी यांनी रस्ते अधिकारी, ठेकेदार यांची २३ डिसेंबर २०२३ रोजी गोवा येथील ताज हॉटेलमध्ये बैठक घेऊन लोकांना त्रास होऊ नये आणि मागणी असेल तर शिरोली सांगली फाटा ते उचगाव रेल्वे पुलापर्यंत पिलरचा उड्डाणपूल करा. याबाबत अभ्यास करून वाढीव प्रस्ताव सादर करा, असे सांगून पिलरच्या उड्डाणपुलाला ग्रीन सिग्नल दिला होता.

डीपीआर तयार, मंजुरीनंतर काम हाेणार सुरू

पुणे-बंगळुरू महामार्गावरील सांगली फाटा ते उचगाव आणि कागल शहरातील उड्डाणपूल, पंचगंगा नदीवरील बास्केट ब्रिज यांचे ‘डीपीआर’ तयार केले आहेत. येत्या आठवड्यात हे ‘डीपीआर’ केंद्र शासनाकडे मंजुरीसाठी सादर करण्यात येणार आहेत. हा प्रस्ताव मंजूर करून त्याची निविदा आणि टेंडर काढून या कामाचा नवीन ठेकेदार नेमण्यात येणार असून, त्यानंतर हे काम सुरू होणार आहे.

शिरोली-सांगली फाटा ते उचगाव रेल्वे उड्डाणपुलापर्यंत पिलरचा उड्डाणपूल लवकर होणे आवश्यक आहे. यामुळे महापुराचा धोका टळणार आहे तसेच वाहतुकीची कोंडी आणि अपघात होणार नाहीत. या उड्डाणपुलास मंजुरी देऊन लवकरात लवकर काम सुरू करावे. - शशिकांत खवरे, माजी सरपंच
 

महापुरामुळे महामार्गावर बंधारा तयार होऊन शिरोली गावासह इतर गावांना तसेच कोल्हापूर शहराला महापुराचा विळखा पडत होता. पिलरचा उड्डाणपूल झाल्यावर शिरोलीसह पंचगंगा नदीकिनाऱ्यावर असणाऱ्या गावांना मोठा दिलासा मिळणार आहे. -पद्मजा करपे, सरपंच, शिरोली