कोल्हापूर : येथील शिवाजी विद्यापीठात शुक्रवारी छत्रपती शिवाजी महाराजांची जयंती उत्साही वातावरणात साजरी करण्यात आली. सकाळी साडेआठ वाजता कुलगुरू डॉ. डी. टी. शिर्के, प्र-कुलगुरू डॉ. पी. एस. पाटील यांच्या प्रमुख उपस्थितीत छत्रपती शिवाजी महाराजांच्या प्रतिमेला पुष्पहार अर्पण करून अभिवादन करण्यात आले. त्यानंतर कुलगुरू डॉ. शिर्के यांच्या हस्ते विद्यापीठ ध्वज फडकवून त्याला वंदन करण्यात आले.
शिवजयंतीनिमित्ताने विद्यापीठाच्या मुख्य प्रशासकीय भवनासमोरील छत्रपती शिवाजी महाराजांच्या पुतळ्याला पुष्पहार अर्पण करण्यात आला. यावेळी पुतळ्यासभोवतालचा परिसर पुष्पमालांनी सुशोभित करण्यात आला होता. या पुतळ्यालाही कुलगुरूंसह मान्यवरांनी अभिवादन केले. कोविडच्या नियमांचे पालन करून हा कार्यक्रम घेण्यात आला. यावेळी कुलसचिव डॉ. विलास नांदवडेकर, परीक्षा व मूल्यमापन मंडळाचे संचालक गजानन पळसे, वित्त व लेखाधिकारी व्ही. टी. पाटील, अधिष्ठाता डॉ. आर. के. कामत, श्रीकृष्ण महाजन, डॉ. एम. एस. देशमुख, नमिता खोत, ए. एम. गुरव, आर. व्ही. गुरव, पी. टी. गायकवाड, अभय जायभाये, आदी उपस्थित होते. दरम्यान, दिवसभरात शिवप्रेमी आबालवृद्धांनी छत्रपती शिवाजी महाराजांच्या प्रतिमेचे दर्शन घेऊन अभिवादन केले. शिवजयंतीनिमित्ताने विद्यापीठाच्या मुख्य प्रशासकीय भवनाला आकर्षक विद्युतरोषणाई करण्यात आली आहे.
फोटो (१९०२२०२१-कोल-विद्यापीठ शिवजयंती) : कोल्हापुरात शुक्रवारी शिवाजी विद्यापीठात शिवजयंतीनिमित्त छत्रपती शिवाजी महाराजांच्या प्रतिमेला कुलगुरू डॉ. डी. टी. शिर्के यांनी पुष्पहार अर्पण करून अभिवादन केले. यावेळी पी. एस. पाटील, विलास नांदवडेकर, आदी उपस्थित होते.