आयटी पार्क जागेच्या हस्तांतरणाचा अध्यादेश, कोल्हापूरकरांचे स्वप्न पूर्ण होण्याचा मार्ग मोकळा

कृषी विभागाला पर्यायी जागा कोणती?

कोल्हापूर : कोल्हापुरातील शेंडा पार्कातील कृषी विभागाच्या ताब्यातील ३४.३६ हेक्टर जागा महाराष्ट्र औद्योगिक विकास महामंडळाला हस्तांतरित करण्याचा शासन अध्यादेश शुक्रवारी राज्य सरकारच्या महसूल विभागाने काढला आहे. त्यामुळे गेल्या अनेक वर्षांपासून रेंगाळलेले आयटी पार्कचे स्वप्न पूर्ण होण्याचा मार्ग मोकळा झाला आहे.

कोल्हापुरात आयटी पार्कसाठी राज्य सरकारने कृषी विभागाची ३४.३६ हेक्टर जागा विकसित करण्यासाठी एमआयडीसीकडे हस्तांतरित करण्यास मंत्रिमंडळाच्या बैठकीत मंजुरी दिली होती. या मंजुरीचा अध्यादेश शुक्रवारी काढण्यात आला. ही जागा कृषी विभागाकडून महसूलकडे हस्तांतरित होईल.

या जमिनीचे कृषिक दराने बाजारमूल्यानुसार ठरलेली रक्कम एमआयडीसीकडून महसूल विभागाला देण्यात येईल. त्यानंतर ही जमीन एमआयडीसीकडे हस्तांतरित होणार आहे. एमआयडीसी ही जागा विकसित करून जमिनीच्या क्षेत्रानुसार प्लॅन तयार करून आयटी पार्कसाठी उपलब्ध करून देणार आहे.

कृषी विभागाला पर्यायी जागा कोणती?

शेंडा पार्कातील कृषी विभागाच्या जागेच्या बदल्यात त्यांना दुसरी जागा उपलब्ध करून देणे बंधनकारक आहे. याची कार्यवाही जिल्हाधिकाऱ्यांनी करावी, असे या अध्यादेशात म्हटले आहे. याआधी सांगरुळ येथील वनविभागाच्या जागेचा पर्याय कृषी विभागाला देण्यात आला होता. मात्र, ती जागा पसंत पडली नसल्याने हस्तांतरण थांबले होते.