हसणे म्हणजे हृदयाचे बोलणे : कुलकर्णी

हसणे म्हणजे हृदयाचे बोलणे : कुलकर्णी

कोल्हापूर : आयुष्यातील दु:खाचे विस्मरण करणे, हा खरा विनोदाचा उद्देश असतो. हसणे म्हणजे मनातील आनंदाला जन्म देणे होय. हसण्यामुळे खडतर जीवनसुद्धा सुलभ होते. हसणे म्हणजे हृदयाचे बोलणे होय, असे प्रतिपादन प्रा. राहुल कुलकर्णी यांनी केले.प्रायव्हेट हायस्कूलच्या सभागृहात आज, सोमवारी ब्राह्मण सभा करवीर, मंगलधाम आणि श्री महालक्ष्मी को-आॅप. बँक. लि. यांच्या संयुक्त विद्यमाने आयोजित तात्यासाहेब तेंडुलकर स्मृती व्याख्यानमालेत ‘हास्याचे जीवनातील स्थान’ या विषयावर ते बोलत होते. कुलकर्णी यांनी आपल्या व्याख्यानात उपस्थित श्रोत्यांना मनमुराद हसवत त्यांनी जीवनातील हसण्याचे महत्त्व सांगितल, तर सध्या धावपळीच्या युगात प्रत्येकजण तणावाखाली आहे. त्यांच्याकडे हसायलाही वेळ नाही. आपल्यातील जिवंतपणा हरवला आहे, अशा गंभीर गोष्टींचा उलघडा करत त्यांनी आपल्या व्याख्यानाची सुरुवात केली. हसण्याचे अनेक फायदे असतानासुद्धा अजूनही आपल्याकडे हसण्याबाबत आदर राखला जात नाही. हसण्यामुळे आपल्या जीवनातील अनेक ताण-तणाव कमी होतात; पण आपले आयुष्य सुंदर वाटू लागते. हास्यांचे ‘विनाकारण हास्य’ व ‘काही कारणास्तव हास्य’असे दोन प्रमुख प्रकार आहेत. यामध्ये काही कारणास्तव हास्य यामध्ये शुद्ध हास्य, उपहासात्मक हास्य, विडंब हास्य, अतिशयोक्ती हास्य, शाब्दिक खेळांचे हास्य असे प्रकार पडतात. यावेळी त्यांनी कोल्हापूरची भाषा आणि अन्य ठिकाणांच्या भाषेतील तुलना दाखवून दिलीच; पण कोल्हापूरकर एखाद्याला मदत करायची असेल, तर कसा जिवापाड करतात याचे उदाहरणच यावेळी सांगितले. यावेळी श्रीकांत लिमये यांनी प्रास्ताविक केले, तर दीपक भागवत यांनी सूत्रसंचालन केले.