कोल्हापूर : कोरोनाच्या कहराने सारे जग हादरले. त्यात भारतातील लाॅकडाऊनमुळे नागरिकांना अनेक अडचणींना सामोरे जावे लागले. या अडचणींचा सामना करीत हुपरी (ता. हातकणंगले) येथील ओंकार पोतदार, रवी पायमल यांनी जबाबदार या लघुपटाची निर्मिती केली. आता हा लघुपट अमेरिकेतील युव्हीट सिनेप्लॅक्स या ओटीटी प्लॅटफाॅर्मवर त्याचे स्क्रिनिंग होणार आहे.
‘माझे कुटुंब, माझी जबाबदारी’ या मध्यवर्ती विषयावर लघुपट तयार करण्यात आला आहे. यातून कोरोनाच्या काळात व त्यानंतरचे काही दिवस सर्वांनी मास्क बंधनकारकच केला पाहिजे, असा संदेश या लघुपटातून दिला आहे. मागील महिन्यातील २६ तारखेला तो सर्वत्र प्रदर्शित झाला. त्यानंतर इटली, जपान, अमेरिका आदी आठ आंतरराष्ट्रीय फेस्टिव्हलची नामांकनेही या लघुपटाने मिळवली. अमेरिकेतील युव्हीट सिनेप्लॅक्स या ओटीटी प्लॅटफाॅर्मवर आता तो अधिकृतरित्या दाखविला जाणार आहे. रवी पायमल, रेणू रांगोळे, सायली कुलकर्णी, शरद पोवार, महादेव केरू आदींंच्या या लघुपटात भूमिका आहेत. किरण खड्ड यांचे दिग्दर्शन व लेखन आहे. ओंकार पोतदार यांनी छायांकन, संकलन केले आहे. सूरज गवळी यांनी संगीत, तर विजय रजपूत, अविनाश शिंदे यांनी सहायक दिग्दर्शक म्हणून काम केले आहे.
फोटो : २००२२०२१-कोल-जबाबदार
ओळी : जबाबदार चित्रपटातील एक दृश्य.