कोल्हापूर : कायदा सुव्यवस्थेचा मुद्दा उपस्थित करत कन्हैयाकुमारच्या आज शनिवारी दसरा चौकात होणाऱ्या जाहीर सभेला पोलिसांनी शुक्रवारी परवानगी नाकारली. यावरून आयोजक व पोलिसांमध्ये लक्ष्मीपुरी पोलीस ठाण्यात जोरदार वादावादी झाली. पोलीस परवानगी न देण्यावर ठाम राहिल्याने आयोजकांनी सभा यशस्वी करण्याचा निर्धार करून सभेची तयारी सुरू केली.
गोविंदराव पानसरे यांच्या सहाव्या स्मृतिदिनाचे औचित्य साधून शनिवारी यूथ फेडरेशनने जवाहरलाल नेहरू विश्वविद्यालयातील विद्यार्थी नेता कन्हैयाकुमारच्या जाहीर सभेचे सायंकाळी सात वाजता दसरा चौकात आयोजन केले होते. त्यासाठी महानगरपालिकेने गेल्या सोमवारीच साडेपाच हजार रुपये भाडे घेऊन मैदानही वापरण्यास दिले आहे. जिल्हाधिकाऱ्यांनीही सभेला परवानगी दिली आहे. असे असतानाही शुक्रवारी लक्ष्मीपुरी पोलीस ठाण्याचे मंगेश चव्हाण यांनी कायदा व सुव्यवस्थेचा प्रश्न उपस्थित करत ही सभा घेण्यास परवानगी देता येत नसल्याचे आयोजक गिरीश फोंडे यांना कळवले. यावरून वातावरण तापले.
पोलीस प्रशासनातर्फे चव्हाण यांनी हा खुल्या मैदानात कार्यक्रम होत असल्याने परवानगी देता येणार नाही, बंदिस्त सभागृहात घ्या, असे सुचवले; पण याला आयोजकांकडून नकार आला. पानसरे यांच्यासारख्या पुरोगामी विचारवंताचा खून होतो, त्याच्या मारेकऱ्यांचा शोध घेतला नाही हे निषेधार्ह आहे. अशा प्रकारे गळचेपी सहन करणार नाही, असे सांगत कार्यकर्ते पोलीस ठाण्यातून संध्याकाळी बाहेर पडले.
चौकट ०१
रविशकुमार यांचा ऑनलाइन कार्यक्रम
पानसरे स्मृतिदिनानिमित्त श्रमिक प्रतिष्ठानतर्फे रविशकुमार, कुमार केतकर यांचा ऑनलाइन व्याख्यानाचा कार्यक्रम मात्र आज शनिवारी ठरल्याप्रमाणे सायंकाळी साडेपाच वाजता शाहू स्मारक सभागृहात होत आहे. यासाठी बैठक व्यवस्थेसह स्क्रीन लावण्याची व्यवस्था करण्यात आली आहे.