कोल्हापुरातील जोतिबा डोंगरावरील पुजारी-भाविक मारहाण प्रकरण तापलं, निषेधार्थ भाविकांचा मोर्चा

देखाव्यातून मांडली पुजाऱ्यांची वागणूक

कोल्हापूर : पुजाऱ्यांनी भाविकांना बेदम मारहाण केल्याच्या निषेधार्थ परितेसह (ता.करवीर) भोगावती खोऱ्यातील ग्रामस्थांनी जोतिबा देवस्थानच्या पुजाऱ्यांविरोधात कोल्हापुरातील जिल्हाधिकारी कार्यालयावर सोमवारी मोर्चा काढला. या मोर्चात महिलांसह नागरिक हजारोंच्या संख्येने सहभागी झाले होते. 

हलगी वादनावरुन पुजारी व परिते ग्रामस्थांमध्ये झालेल्या वादातून पुजाऱ्यांनी भाविकांना बेदम मारहाण केली. शिवाय भाविकांनी मद्यप्राशन केल्याची बदनामी केल्याचा आरोप करत परितेसह भोगावती खोऱ्यातील कुरुकली, हळदी, घोटवडे, राशिवडे, ठिकपुर्ली, कोथळी, कांडगाव, देवाळे, कौलव, सिरसेसह पंचक्रोशीतल ग्रामस्थांनी जिल्हाधिकारी कार्यालयावर मोर्चा काढला. 

सकाळी ११ वाजल्यापासून भोगावती खोऱ्यातील नागरिक दसरा चौकात येण्यास सुरुवात झाली. शहाजी कॉलेजच्या मैदानावर नागरिक जमा होत होते. तेथून १२ :३० च्या दरम्यान नागरिक मोर्चाद्वारे जिल्हाधिकारी कार्यालयाकडे रवाना झाले. नाही चालणार, नाही चालणार दादागिरी नाही चालणार, जोतिबा मंदिरातील दोषी पुजाऱ्यांना अटक झालीच पाहिजे, भाविकांना न्याय मिळायलाच हवा, पूजारी हटाव जोतिबा बचाव यासह अनेक फलक घेऊन मोर्चेकरी दसरा चौक, व्हिनस कॉर्नरमार्गे जिल्हाधिकारी कार्यालयावर धडकले. येथे मोर्चेकरांच्यावतीने जिल्हाधिकाऱ्यांना निवेदन देण्यात आले.

देखाव्यातून मांडली पुजाऱ्यांची वागणूक

या मोर्चात जोतिबावरील पूजारी भाविकांना कशा प्रकारे वागणूक देतात याचा एक सजीव देखावा तयार करण्यात आला होता. एका ट्रॅक्टर ट्रॉलीत केदार पाटील या सहावीतील मुलाला जोतिबा बनवण्यात आले होते. तर पुढे पाच-सहा पुजारी एका भाविकाच्या डोक्यावर नारळ फोडत आहेत असा देखावा केला होता.