लोकमत न्यूज नेटवर्क, कोगनोळी : महाराष्ट्रातील कोरोना रुग्णांच्या दुसऱ्या टप्प्यात वाढणाऱ्या संख्येमुळे कर्नाटक राज्य सरकारने खबरदारी घेण्यास सुरुवात केली आहे. महाराष्ट्र-कर्नाटक आंतरराज्य सीमा असणाऱ्या कोगनोळी टोल नाका याठिकाणी तपासणी पथकाची उभारणी करण्यात आली आहे. बेळगाव जिल्हा प्रशासन व निपाणी तालुका प्रशासन यांच्या वतीने कोगनोळी टोल नाका या ठिकाणी कर्नाटकात प्रवेश करणाऱ्या वाहनांची तपासणी करण्यात येत आहे. जर वाहनातील प्रवाशांमध्ये कोरोना संसर्गजन्य आजाराची लक्षणे आढळून येत असतील तर त्यांना प्रवेश दिला जाणार नाही, असे यावेळी निपाणी तालुक्याचे तहसीलदार प्रकाश गायकवाड यांनी सांगितले. कोगनोळी टोल नाका येथील तपासणी पथकासाठी तालुका आरोग्य विभाग, तालुका महसूल विभाग यांच्या कर्मचाऱ्यांच्या साहाय्याने या बूथवर प्रवाशांची तपासणी केली जाणार आहे.
२० कोगनोळी टोलनाका
फोटो ओळ : महाराष्ट्र-कर्नाटक आंतरराज्य सीमेवर कर्नाटक शासनाच्या वतीने कोरोना तपासणी पथकाची उभारणी करून प्रवाशांची तपासणी करण्यात येत आहे.
छाया : बाबासो हळिज्वाळे