कोल्हापूर : लोकसभा निवडणुकीत एनडीए ४०० हून अधिक जागांवर यश मिळवेल असा विश्वास आंध्र प्रदेशचे माजी मुख्यमंत्री चंद्राबाबू नायडू यांनी गुरुवारी व्यक्त केला. करवीर निवासिनी श्री अंबाबाईचे त्यांनी सपत्नीक दर्शन घेतले. यावेळी त्यांनी पत्रकारांशी साधलेल्या संवादात अंबाबाईचे दर्शन घेऊन खूप आनंद झाला, देशात शांतता नांदावी, सर्वांना अंबाबाईचा आशीर्वाद मिळावा, अशी प्रार्थना केल्याचे सांगितले.सकाळी साडेअकरा वाजता ते अंबाबाई मंदिरात आले. यावेळी मंदिर परिसरात अनुचित प्रकार घडू नये यासाठी कडेकोट पोलिस बंदोबस्त ठेवण्यात आला होता. सुमारे अर्धा तास त्यांनी अंबाबाईची पूजा केली. त्यानंतर पत्रकारांशी संवाद साधला, मात्र आंध्र प्रदेशमधील राजकारणावर काही बोलणार नाही अशी प्रतिक्रिया दिली. सध्या देशात निवडणूक सुरू असून, एनडीएसाठी अनुकूल वातावरण आहे. यामुळे एनडीएला ४०० हून अधिक जागा मिळतील असा विश्वास त्यांनी व्यक्त केला.
एनडीएला ४०० हून अधिक जागांवर मिळेल यश, चंद्राबाबू नायडू यांनी व्यक्त केला विश्वास
By ऑनलाइन लोकमत | Published: May 17, 2024 12:23 PM