दत्तवाड जिल्हा परिषद, नांदणी पंचायत समितीच्या निवडणुकीकडे लक्ष

दत्तवाड येथील जिल्हा परिषद सदस्य प्रवीण माने यांच्या निधनाने गेल्या दीड वर्षापासून ही जागा रिक्त झाली आहे; तर दानोळी पंचायत समिती सदस्य सुरेश कांबळे यांच्या निधनाने ही जागाही रिक्त झाली आहे. कोरोना महामारीच्या पार्श्वभूमीवर निवडणुका होऊ शकल्या नव्हत्या. दरम्यान, तहसीलदार डॉ. अपर्णा मोरे यांनी दत्तवाड जिल्हा परिषद व दानोळी पंचायत समिती मतदारसंघातील मतदार याद्या प्रसिद्ध केल्या असून, निवडणूक कार्यालय येथे त्या अंतिम याद्या प्रसिद्ध करण्यात आल्या आहेत. त्यामुळे निवडणुकीच्या तारखेकडे सर्वच राजकीय पक्षांचे लक्ष लागून राहिले आहे. सध्या झालेल्या ग्रामपंचायतीच्या निवडणुकीचे पडसाद या निवडणुकीत उमटण्याची शक्यता नाकारता येत नाही. त्यामुळे या निवडणुकीत राजकीय पक्ष कोणती भूमिका घेतात, याकडे सर्वांचेच लक्ष लागून राहिले आहे.