Kolhapur- Gokul Dudh Sangh: अरुण डोंगळेंचा अखेर राजीनामा

कार्यकारी संचालकांकडे केला सादर : गुरुवारच्या संचालक मंडळाच्या बैठकीत मंजूरी

कोल्हापूर : ‘गोकुळ’ दूध संघाचे अध्यक्ष अरुण डोंगळे यांनी मंगळवारी सकाळी अकरा वाजता राजीनामा दिला. राजीनाम्याचे पत्र, ज्येष्ठ संचालक विश्वास पाटील यांच्याकडे देण्यात आले, त्यांनी तातडीने संघाचे कार्यकारी संचालक डॉ. योगेश गोडबोले यांच्याकडे सादर केले. गुरुवारी (दि. २२) संचालक मंडळाची बैठक होत असून यामध्ये डोंगळे यांचा राजीनामा मंजूर केला जाणार आहे.

मुख्यमंत्री देवेंद्र फडणवीस व उपमुख्यमंत्री एकनाथ शिंदे यांचे नाव पुढे करत अरुण डोंगळे यांनी राजीनामा देण्यास नकार दिला होता. त्यावरुन, गेली सात दिवस वादळ उठले होते.  रविवारी, वैद्यकीय शिक्षणमंत्री हसन मुश्रीफ यांच्या सोबत झालेल्या बैठकीत मंगळवारी मुख्यमंत्री फडणवीस व उपमुख्यमंत्री शिंदे यांची भेट घेऊन राजीनामा देण्याची सूचना केली होती.

त्यानुसार डोंगळे सोमवारी दुपारीच मुंबईकडे रवाना झाले. मंगळवारी सकाळी अकरा वाजता त्यांनी अध्यक्षपदाचा राजीनामा ज्येष्ठ संचालक विश्वास पाटील यांच्याकडे दिला, पाटील यांनी तो कार्यकारी संचालक डॉ. गोडबोले यांना दिला. मंत्री मुश्रीफ यांनी डोंगळे यांचे बंड मोडून काढत असतानाच इतर सहकारी संस्थांतील पदाधिकाऱ्यांना एक प्रकारे इशारा दिल्याची चर्चा सहकारात सुरु आहे.